У паведамленьні адзначаецца, што да 22 сьнежня пабудавана 110,1 км (98%) з заплянаваных на сёлета 112 км памежнай загароды ўздоўж мяжы, агульная даўжыня якой складае 173 км.
На водных участках мяжы — рэках, ручаях і балотах — будоўлю памежнай загароды плянуецца завяршыць да ліпеня наступнага году. Цяпер на гэтых участках завершаныя праектныя працы для стварэньня 33,5 км палос патруляваньня. Там ужо пачалі высякаць лясы на землях, якія знаходзяцца ў дзяржаўнай уласнасьці, што павінна дазволіць пачаць будоўлю загароды раней за плянавыя тэрміны.
На рацэ Даўгава вядуцца праектныя работы, якія прадугледжваюць будоўлю шасьці вышак сувязі з пад’язнымі шляхамі, а таксама 16,7-кілямэтровай патрульнай паласы.
Паводле інфармацыі МУС, чакаецца, што ўся агароджа латвійскай усходняй прымежнай зоны з Расеяй і Беларусьсю будзе гатовая да пачатку 2025 году, пасьля чаго працягнецца мантаж іншых элемэнтаў памежнай інфраструктуры.
ГЛЯДЗІЦЕ ТАКСАМА: Новы кіраўнік МУС Польшчы заявіў пра пляны ўмацаваць загароду на мяжы зь БеларусьсюКамэнтуючы завяршэньне будоўлі сухапутнай часткі загароды на мяжы зь Беларусьсю, міністар унутраных спраў Латвіі Рыхард Казлоўскіс адзначыў, што яно «зьяўляецца важным крокам ва ўмацаваньні бясьпекі зьнешняй мяжы Латвіі і Эўрапейскага Зьвязу». «Хоць колькасьць нелегальных парушальнікаў на латвійска-беларускай мяжы зьменшылася, агароджа на сухапутнай мяжы істотна дапаможа памежнікам у затрыманьні мігрантаў», — заявіў Казлоўскіс.
Ён таксама падкрэсьліў, што «праца па ўмацаваньні ўсходняй мяжы не спыняецца, наадварот, у 2024 годзе будуць праводзіцца інтэнсіўныя працы па ўладкаваньні і латвійска-расейскай мяжы».
Міністар фінансаў Латвіі Арвілс Ашэрадэнс адзначыў, што «геапалітычная нестабільнасьць побач зь дзяржавамі-агрэсарамі» і «пагроза гібрыднай вайны» павінны ўспрымацца краінай «вельмі сур’ёзна». Міністар заклікаў «працягваць рашуча інвэставаць ва ўнутраную і зьнешнюю бясьпеку краіны, каб кожны жыхар Латвіі мог адчуваць сябе ў бясьпецы, калі вучыцца, працуе, выхоўвае дзяцей або падарожнічае».
- Прычына пачатку будоўлі загароды — міграцыйны крызіс на мяжы Беларусі і краін ЭЗ, які пачаўся вясной 2021 году. З пачатку 2023 году Латвія спыніла 13859 спроб незаконнага пранікненьня нелегальных мігрантаў зь беларускай тэрыторыі.
- Сёньня ж новы міністар унутраных спраў Польшчы Марцін Кервіньскі заявіў, што польскі ўрад зьбіраецца ўмацаваць загароду на мяжы зь Беларусьсю, пабудаваную для абароны ад нелегальных мігрантаў.
Мігранцкі крызіс — 2021. Асноўнае
- У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
- Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
- Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
- У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
- Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
- Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
- Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
- 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
- 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
- На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
- 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
- У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
- 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
- 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
- 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
- Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
- 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
- Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
- 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
- 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.
- На больш чым дзесяці эвакуацыйных рэйсах у Ірак і Сырыю ў лістападзе-сьнежні Беларусь пакінулі каля 4,5 тысяч мігрантаў.
- На пачатку 2022 году сталі вядомыя тэрміны пабудовы агароджаў на мяжы зь Беларусьсю. Польшча адзначыла, што агароджу дабудуюць да канца чэрвеня, а Літва, што да восені.
- За 2023 год памежнікі суседніх зь Беларусьсю краін Эўразьвязу спынілі 42 тысячы спробаў нелегальнага пранікненьня на сваю тэрыторыю, што на траціну больш за 2022 год.
- Шараговец 1-й Варшаўскай бранятанкавай брыгады Матэвуш Сітэк, паранены нажом 28 траўня 2024 году на мяжы зь Беларусьсю, памёр 6 чэрвеня ў Варшаве. Раненьне вайсковец атрымаў падчас спыненьня спробы групы мігрантаў прарвацца праз сталёвую загароду зь беларускага боку. Калі салдат блякаваў пралом у сталёвай агароджы на мяжы з дапамогай ахоўнага шчыта, мігрант, прасунуўшы руку праз плот, нанёс яму ўдар нажом, прывязаным да палкі, у грудзі. Нож затрымаўся ў целе жаўнера. У бок пацярпелага і памежніка, які дапамагаў яму, кідалі палкі і камяні.