Ізраіль нанёс авіяўдар па рэзыдэнцыі кіраўніка палітбюро ХАМАСу

Армія абароны Ізраілю паведаміла, што ў ноч на 16 лістапада зьнішчальнікі ЦАХАЛ нанесьлі ўдар па рэзыдэнцыі кіраўніка палітбюро радыкальнай палестынскай групоўкі ХАМАС Ісмаіла Ханіі ў сэктары Газа. ХАМАС прызнаны тэрарыстычнай арганізацыяй у ЗША і краінах ЭЗ.

Пра пацярпелых не паведамляецца. Сам Ханія, паводле шэрагу зьвестак, знаходзіцца за межамі сэктару.

Рэзыдэнцыя Ханіі выкарыстоўвалася як элемэнт тэрарыстычнай інфраструктуры і часта служыла месцам сустрэч вышэйшых лідэраў ХАМАСу для абмеркаваньня тэрарыстычных нападаў супраць грамадзян Ізраілю і ізраільскіх вайскоўцаў, гаворыцца ў ранішняй зводцы ЦАХАЛ.

Сярод іншага, вайскоўцы напісалі пра захоп лягера Аль-Шаці ў заходнім прыгарадзе Газы, дзе, паводле іх зьвестак, знайшлі і зьнішчылі тайнік «вайскова-марскіх сіл ХАМАСу» з вадалазным рыштункам, выбуховымі прыладамі і зброяй.

У чацьвер Ізраіль працягнуў дзеяньні ў рамках ваеннай апэрацыі на тэрыторыі бальніцы «Аль-Шыфа», якую называюць найбуйнейшай у Газе. Міністэрства аховы здароўя сэктару Газа, падкантрольнае ХАМАСу, заявіла ў чацьвер, што ізраільскія бульдозэры разбурылі частку паўднёвага ўваходу ў бальніцу. Ізраільскае кіраўніцтва мяркуе, што пад комплексам «Аль-Шыфа» баевікі стварылі сетку тунэляў і што там месьціцца камандны пункт ХАМАСу. Сама групоўка і супрацоўнікі бальніцы гэта адмаўляюць, зазначае France-Presse.

Да таго як у сераду ізраільскія войскі ўвайшлі на тэрыторыю «Аль-Шыфы», там, паводле ацэнак агенцтваў ААН, знаходзіліся каля 2300 пацыентаў, мэдычных супрацоўнікаў і перамешчаных цывільных асоб, якія схаваліся ў шпіталі пасьля пачатку ізраільскай апэрацыі ў сэктары Газа. Вайскоўцы падкрэсьліваюць, што падчас апэрацый яны імкнуцца не прычыняць шкоды супрацоўнікам мэдустановы і цывільнаму насельніцтву.

Рада Бясьпекі ААН 15 лістапада прыняла рэзалюцыю з заклікам да працяглага гуманітарнага перамір’я ў сэктары Газа для дастаўкі дапамогі мірным жыхарам. МЗС Ізраілю адмовіла, заявіўшы, што пакуль ХАМАС утрымлівае закладнікаў, падобныя меры недарэчныя, перадае BBC.

ГЛЯДЗІЦЕ ТАКСАМА: У Пэнтагоне заявілі аб нанясеньні ўдараў па дзьвюх іранскіх базах у Сырыі

Прэзыдэнт ЗША Джо Байдэн заявіў у гутарцы з журналістамі 15 лістапада, што ён, са свайго боку, робіць усё магчымае для вызваленьня ізраільцян, якія апынуліся ў закладніках у ХАМАСу. ЗША лічацца галоўным вайскова-палітычным саюзьнікам Ізраілю. Таксама, па словах Байдэна, ён даў выразна зразумець ізраільскаму прэм’еру Біньяміну Нэтаньягу, што формула суіснаваньня дзьвюх дзяржаў, Ізраілю і Палестыны, — адзіны варыянт разьвязаньня блізкаўсходняга канфлікту, а новая акупацыя Газы стане «вялікай памылкай». Нэтаньягу, гаворачы днямі пра пасьляваенныя пляны Ізраілю, заўважыў, у прыватнасьці, што краіна захавае кантроль над бясьпекай у сэктары Газа — з магчымасьцю свабодна ўваходзіць у рэгіён для высочваньня экстрэмістаў.

Ізраіль заявіў пра намер выкараніць ХАМАС у адказ на тэракты 7 кастрычніка, калі члены радыкальнай групоўкі напалі на поўдзень краіны, забіўшы 1200 чалавек, у асноўным зь ліку цывільнага насельніцтва. Каля 240 чалавек баевікі ўзялі ў закладнікі, у тым ліку дзяцей і старых.

Міністэрства аховы здароўя Газы сьцьвярджае, што падчас апэрацыі ЦАХАЛу і ізраільскіх удараў па сэктары загінулі прыкладна 11 з паловай тысячы чалавек.

ГЛЯДЗІЦЕ ТАКСАМА: Армія абароны Ізраілю заявіла, што ХАМАС страціў кантроль над Газай

Вайна Ізраілю з ХАМАСам. Асноўнае

7 кастрычніка Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
Колькасьць параненых беларусаў на 10 кастрычніка — 3 чалавекі. Стан адной з параненых жанчын цяжкі.
10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
Ізраіль у лістападзе пайшоў у атаку на сэктар Газа і заявіў аб пашырэньні наземнай апэрацыі.
22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
Разбуральная вайна Ізраілю ў cэктары Газа ў лічбах.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША.
Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.