Урад ЗША ўвёў санкцыі супраць расейскіх кампаній, якія рэалізуюць найбуйнейшы праект для вытворчасьці звадкаванага газу «Арктык СПГ 2».
«На мінулым тыдні, напрыклад, мы ўвялі новыя санкцыі датычна „Арктык СПГ 2“ — ключавога праекту „Новатэка“ ў сфэры звадкаванага прыроднага газу. Наша мэта заключаецца ў тым, каб спыніць існаваньне гэтага праекту», — заявіў Джэфры Пает, памочнік дзяржаўнага сакратара ЗША ў пытаньнях энэргетыкі, паведаміў «Голас Амэрыкі».
Паводле яго, увядзеньне санкцый будзе адбывацца ў супрацы з партнэрамі па G7. ЗША ўжо пачалі ўводзіць санкцыі супраць прадпрыемстваў, якія ўдзельнічаюць у рэалізацыі праекту «Арктык СПГ 2», а Міністэрства фінансаў працягвае адсочваць усе зьвязаныя зь ім бізнэс-структуры.
Джэфры Пает мяркуе, што далейшы ціск альбо спыніць рэалізацыю праекту, альбо зробіць яго нерэнтабэльным.
ГЛЯДЗІЦЕ ТАКСАМА: ЗША ўвялі санкцыі супраць 200 расейскіх фірмаў і ўстановаўШто вядома пра праект
Праект «Арктык СПГ 2» прадугледжвае будаўніцтва трох тэхналягічных ліній для вытворчасьці звадкаванага прыроднага газу (ЗПГ) агульнай магутнасьцю 19,8 мільёна тон на год і стабільнага газавага кандэнсату да 1,6 мільёна тон на год.
Апэратарам праекту і ўласьнікам усіх яго актываў зьяўляецца ТАА «Арктык СПГ 2», супольнае прадпрыемства ПАТ «Новатэк» (60%), канцэрн TotalEnergies (10%), кітайскія карпарацыі CNPC (10%), CNOOC (10%), а таксама JAPAN ARCTIC LNG (кансорцыюм японскіх кампаній MITSUI і JOGMEC) (10%).
Капітальныя ўкладаньні для запуску праекту на ўсю магутнасьць ацэньваюцца ў эквіваленце 21,3 мільярда даляраў.
На канец 2021 году асноўнымі акцыянэрамі кампаніі «Новатэк» былі расейскія мільярдэры Леанід Міхельсон (24,8 %), Генадзь Цімчанка (23,5 %), «Газпром» (10,0 %), а таксама Total (19,4 %) — гэтая частка фактычна замарожаная з 2022 году, кампанія вырашыла сьпісаць актыў як страты.
Базавым рэсурсным цэнтрам праекту зьяўляецца радовішча, разьмешчанае на паўвостраве Гыдан у Ямала-Нянецкай аўтаномнай акрузе, прыкладна за 70 кілямэтраў ад праекту «Ямал СПГ» праз Обскую губу.
Праект «Арктык СПГ 2» пачалі рэалізоўваць у 2018 годзе.
ГЛЯДЗІЦЕ ТАКСАМА: Bloomberg: з пачатку вайны найбагацейшыя расейцы страцілі звыш $93 млрд