Напрыканцы верасьня ў судзе Кастрычніцкага раёну Магілёва разгледзелі справу супраць сьлесара. Яго абвінавацілі ў «распаўсюдзе экстрэмісцкіх матэрыялаў» паводле арт. 19.11 КаАП, паведамляюць праваабаронцы.
Так, згодна з пратаколам, «мужчына з дапамогай свайго акаўнта, у адкрытым доступе ва ўкладцы «сябры» разьмясьціў візуальны матэрыял у выглядзе тэксту «Belsat», разьмешчаны на «аватарцы» карыстальніка электроннай анкеты сацыяльнай сеткі «ЎКантакце» пад назвай «Belsat TV».
На судзе мужчына пацьвердзіў, што ведаў пра ўключэньне «Белсата» ў сьпіс экстрэмісцкіх матэрыялаў, але на момант, калі ён дадаваў акаўнт у сябры, «экстрэмісцкай» аватаркі не было. Сваёй віны ён не прызнаў.
Вынікам суду стаў 15-сутачны арышт.
11 дзён арышту прысудзілі адміністратарцы Эвангельскай царквы ў Лепелі
Валянтэрку і адміністратарку Эвангельскай царквы ў Лепелі (Віцебская вобласьць) Вольгу Мадатаву асудзілі на 11 дзён адміністратыўнага арышту. Адбылося гэта яшчэ ў кастрычніку, але вядома стала толькі цяпер, піша ініцыятыва «Хрысьціянская візія».
65-гадовую Вольгу Мадатаву затрымалі 21 кастрычніка. Судзьдзя Дзьмітры Васюк з суду Лепельскага раёну асудзіў яе на 9 дзён арышту за нібыта «несанкцыянаванае пікетаваньне» праз сацыяльныя сеткі, бо яна нібыта мела падпіску на групу з «Пагоняй» на аватарцы, і яшчэ на 9 дзён — за «распаўсюд экстрэмісцкіх матэрыялаў» (у пратаколе згадвалася падабайка пад публікацыяй Радыё Свабода). «Шляхам частковага складаньня канчаткова прыначыў ёй спагнаньне ў выглядзе арышту на тэрмін 11 дзён», удакладняе «Віцебская Вясна».
ГЛЯДЗІЦЕ ТАКСАМА: Хроніка перасьледу 7 лістапада: у Баранавічах за сарваныя дзяржаўныя сьцягі асудзілі двух мужчын ГЛЯДЗІЦЕ ТАКСАМА: Хроніка перасьледу 6 лістапада: Трэнэра акадэміі менскага «Дынама» Артура Мустыгіна пакаралі 3 гадамі «хатняй хіміі»