Выданьне ведае пра затрыманьні на Лепельскім малочным камбінаце, а таксама ў структурах магілёўскай «Бабушкиной крынки» — фармальна прыватнага прадпрыемства, дзе абсалютная большасьць акцый належыць дзяржаве.
Адбыліся затрыманьні і ў іншых гарадах, але адносна іх няма дакладнай інфармацыі.
«Наша ніва» мяркуе, што гаворка ідзе пра абвінавачаньні ў «адкатах» ад дылераў за пастаўкі таннай прадукцыі, як гэта было, напрыклад, у «цукровай справе», па якой затрымлівалі дырэктараў цукровых заводаў. Адным з магістральных абвінавачаньняў тады было тое, што пасьля стварэньня «Беларускай цукровай кампаніі», якая мелася рэалізоўваць цукар, яе кіраўніцтва выбірала контрагентаў па карупцыйных схемах, а ўзяць тавар без «адкату» нібыта было немагчыма.
Беларусь вырабляе ў разы больш малака, чым спажывае ўнутраны рынак. Асноўныя гульцы на рынку перапрацоўкі малака — дзяржаўныя заводы. Сваю прадукцыю яны прадаюць у асноўным на расейскі рынак. У сваю чаргу, Свабода пісала пра тое, што Расея ўводзіла забарону на пастаўкі прадукцыі некаторых беларускіх заводаў.
З заробкамі на малочных прадпрыемствах не заўсёды добра. Напрыклад, сёлета ў траўні работнікі маладачанскага заводу — філіі ААТ «Менскі малочны завод № 1» пратэставалі супраць нізкіх заробкаў.
ГЛЯДЗІЦЕ ТАКСАМА: Работнікі малаказаводу ў Маладэчне сабралі сход на прахадной, пагражаюць звольніцца з прычыны нізкіх заробкаў ГЛЯДЗІЦЕ ТАКСАМА: У гэтыя 12 заводаў улады ўлілі 1,5 млрд даляраў. Цяпер яны ў стратах, 4 зь іх банкруты. Гісторыя дзяржаўнага інвэставаньня