На аўкцыёне прадалі два гадзіньнікі Віктара Бабарыкі

З другога разу на аўкцыёне «БелЮрЗабесьпячэньне» прадалі два гадзіньніка Віктара Бабарыкі. Пра гэта паведамляе партал «Зеркало».

Аўкцыёны па продажы двух гадзіньнікаў Бабарыкі адбыліся 26 кастрычніка. На кожны зь іх зарэгістраваліся па чатыры ўдзельнікі.

Прадавалі гадзіньнікі Vacheron Constantin і Patek Philippe, абодва ў мінулы раз не былі прададзеныя.

На першую мадэль была прызначаная стартавая цана спачатку 39 400 рублёў, потым яе зьнізілі да 31 520 рублёў. У выніку лот прадалі за 48829 рублёў.

ГЛЯДЗІЦЕ ТАКСАМА: Маёмасьць Віктара Бабарыкі зноў выставілі на аўкцыён

Мадэль Patek Philippe была самай дарагой сярод выстаўленых на продаж гадзіньнікаў Бабарыкі. Пачатковая цана складала 47 500 рублёў, пасьля яе зьнізілі да 38 000 рублёў. На таргах гэты гадзіньнік прадалі за 52 560 рублёў.

Маёмасьць Віктара Бабарыка пачалі прадаваць у 2021 годзе. З малатка пайшоў арыштаваны аўтамабіль Ford Fiesta. Таксама выстаўлялі на таргі аптычны прыцэл, які належыць палітыку, і долі ў статутным капітале трох кампаніяў — «Прыватызінг», «Прававы дыялёг» і «Сыстэмы апрацоўкі інфармацыі». Сёлета ў верасьні прадалі сем наручных храномэтраў Бабарыкі.

ГЛЯДЗІЦЕ ТАКСАМА: У Вярхоўным судзе зноў разглядаюць «справу Віктара Бабарыкі». Што пра гэта вядома?

Экс-старшыня праўленьня «Белгазпрамбанку» Віктар Бабарыка 12 траўня 2020 году заявіў пра намер удзельнічаць у прэзыдэнцкіх выбарах. Да моманту рэгістрацыі кандыдатаў Бабарыка быў ужо затрыманы. У рэгістрацыі яму адмовілі на падставе інфармацыі з Камітэту дзяржкантролю.

6 ліпеня 2021 году Вярхоўны суд вынес прысуд, Бабарыка атрымаў 14 гадоў калёніі ўзмоцненага рэжыму. Суд прызнаў яго вінаватым у атрыманьні хабару ў асабліва буйным памеры, арганізаваным групай, а таксама ва ўчыненьні фінансавых апэрацыяў са сродкамі, атрыманымі заведама злачынным шляхам. Віктар Бабарыка на судзе сваёй віны не прызнаў.

ГЛЯДЗІЦЕ ТАКСАМА: Дзе Віктар Бабарыка? Вэрсія былога палітвязьня з наваполацкай калёніі

Увечары 26 красавіка 2023 году зьявілася інфармацыя, што Бабарыка, зьняволены ў турме Наваполацку, у ноч на 25 красавіка быў шпіталізаваны ў гарадзкі шпіталь — нібыта са сьлядамі зьбіцьця і з пнэўматораксам.

27 красавіка штаб Бабарыкі паведаміў, што экс-банкір заставаўся ў шпіталі. Аднак у наступныя дні пра дакладнае месцазнаходжаньне Бабарыкі ў ягонай камандзе ня ведалі, убачыць яго не ўдалося. 29 красавіка прадстаўнік адміністрацыі папраўчай калёніі заявіў, што зьняволены Бабарыка «жывы і здаровы» і працягвае адбываць сваё пакараньне. Аднак ніякіх пацьверджаньняў гэтым словам у сілавых структурах не прывялі.

З таго часу пра месцазнаходжаньне і стан Віктара Бабарыкі няма ніякай інфармацыі.

Перасьлед Віктара Бабарыкі. Што важна ведаць

Віктара Бабарыку абвінавацілі ў «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК).
У крымінальнай справе «Белгазпрамбанку» 122 тамы. Справу разглядаў Вярхоўны суд у будынку суду Маскоўскага раёну.
22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляла ў дастатковай ступені зразумець, у якіх менавіта дзеяньнях абвінавачанага Бабарыкі ўгледзілі злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
Віктар Бабарыка віны не прызнае.

Хроніка перасьледу

10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
12 чэрвеня Лукашэнка заявіў, што Бабарыка таксама датычны да справы, маўляў, «гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
Фігурантамі «справы „Белгазпрамбанку“» сталі каля 20 чалавек.
15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
Штаб Бабарыкі падрыхтаваў да здачы 435 тысяч подпісаў.
20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
12 ліпеня стала вядома, што Бабарыку этапавалі ў ПК №1 у г. Наваполацак.
12 кастрычніка з ізалятараў выйшлі некалькі чалавек, затрыманых у справе «Белгазпрамбанку». Ім зьмянілі меру стрыманьня, але іншыя падрабязнасьці справы невядомыя.
У кастрычніку 2023 году арганізацыя былых сілавікоў BelPol паведамляла, што Віктар Бабарыка ў калёніі мае праблемы з сэрцам. Паводле інфармацыі арганізацыі, Бабарыку нанесьлі «сур’ёзныя цялесныя пашкоджаньні», прычым зрабілі гэта людзі, якія не адносяцца да пэрсаналу наваполацкай калёніі, дзе той сядзіць.