Расея атакавала тэрыторыю паблізу Хмяльніцкай АЭС. Без электрычнасьці засталіся 2000 жыхароў

Хмяльніцкая АЭС. Архіўнае фота

Гэта трэці інцыдэнт на станцыі праз расейскія абстрэлы з пачатку ваеннага ўварваньня Расеі ва Ўкраіну.

Расея чацьвёрты дзень запар атакуе дронамі Хмяльніцкую вобласьць. У ноч на 25 кастрычніка ад чарговага ўдару пацярпела тэрыторыя побач з Хмяльніцкай АЭС.

«Ёсьць пашкоджаньні ў памяшканьнях паблізу станцыі. Без электрычнасьці засталіся 1860 спажыўцоў у гарадах Славута і Няцішын», — адзначаецца ў паведамленьні ўкраінскага ўраду.

У горадзе Няцішын Шапятоўскага раёну знаходзіцца Хмяльніцкая АЭС. Улады вобласьці ўдакладнілі, што «аб’ект крытычнай інфраструктуры» ў Шапятоўскім раёне пацярпеў у выніку падзеньня дронаў, зьбітых ўкраінскімі сродкамі СПА.

Выбуховай хваляй пашкоджаны нежылыя памяшканьні, жылыя будынкі і аўтамабілі. Раненьні атрымалі 16 мясцовых жыхароў.

ГЛЯДЗІЦЕ ТАКСАМА: Ва Ўкраіне пасьля расейскіх атак адключылі некалькі блёкаў на двух АЭС, у тым ліку недалёка ад Беларусі

На Хмяльніцкай АЭС працуюць два энэргаблёкі. Асноўнае прызначэньне станцыі — пакрыцьцё дэфіцыту электрычных магутнасьцяў у заходнім рэгіёне Ўкраіне.

Гэта ня першы інцыдэнт на Хмяльніцкай АЭС, які адбыўся праз абстрэлы з пачатку расейскага ваеннага ўварваньня ва Ўкраіну.

15 лістапада 2022 году ў часе інтэнсіўнага ракетнага абстрэлу Расеяй Хмяльніцкая АЭС страціла доступ да электрасеткі і часова перайшла на працу ў аварыйным рэжыме ад дызэль-генэратараў. У выніку давялося спыняць працу абодвух рэактараў.

ГЛЯДЗІЦЕ ТАКСАМА: Ва Ўкраіне пасьля ракетнай атакі Расеі аварыйна спынілі ўсе АЭС. Улады кажуць, што небясьпекі няма

10 лютага 2023 году, таксама пасьля ракетнага абстрэлу Расеяй, адзін з блёкаў спыніўся празь нестабільнасьць электрасеткі.

Яшчэ адна атамная станцыя — Запароская АЭС — застаецца пад поўным кантролем Расеі з моманту яе захопу ў сакавіку 2022 году.

ГЛЯДЗІЦЕ ТАКСАМА: Ва ўкраінскай выведцы расказалі, як не дапусьцілі падключэньня Запароскай АЭС у расейскую сыстэму