Людзі

У Польшчы падлічылі 88 працэнтаў галасоў на парлямэнцкіх выбарах. Інтрыга застаецца

На галасаваньні ў Польшчы, 15 кастрычніка 2023

Нацыянальная выбарчая камісія Польшчы публікуе частковыя вынікі парлямэнцкіх выбараў 15 кастрычніка.

Нацыянальная выбарчая камісія Польшчы на сваім сайце паведамляе ў рэальным часе пра хаду падліку галасоў на парлямэнцкіх выбарах, якія адбыліся 15 кастрычніка.

Паводле дадзеных камісіі на 19 гадзіну па Варшаве (20 па Менску), падлічана 88,08% галасоў.

Галасы выбаршчыкаў, якія ўжо падлічаныя, разьмеркаваліся наступным чынам:

За партыю «Права і справядлівасьць» (ПіС), якая знаходзіцца ва ўладзе з 2015 году і да якой належаў і прэзыдэнт Анджэй Дуда, — 36,52%.

За «Грамадзянская кааліцыю» на чале з колішнім прэм’ерам Польшчы і эўрадэпутатам Дональдам Тускам — 29,58%.

За кааліцыю «Трэці шлях» — аб’яднаньне «Польшчы 2050» экс-кандыдата ў прэзыдэнты Шымана Галоўні і Польскай народнай партыі — 14,5%.

За аб’яднаньне левых сілаў «Новая Лявіца» — 8,37%.

За правую партыю «Канфэдэрацыя», якая стаіць на пазыцыях эўраскептыкаў, — 7,23%.

Паводле экзыт-полаў, партыя «ПіС» выйграла нядзельныя выбары з падтрымкай 36,8%, але менавіта апазыцыя — «Грамадзянская кааліцыя», «Трэці шлях» і «Лявіца» — сумесна атрымалі большасьць для магчымага фармаваньня ўраду.

Шмат дзе галасаваньне зацягвалася. Напрыклад, на адным з выбарчых участкаў ва Ўроцлаве выбарнікі галасавалі да 3-й гадзіны ночы.

ГЛЯДЗІЦЕ ТАКСАМА: У Польшчы апублікавалі вынікі экзыт-полаў на парлямэнцкіх выбарах. Апазыцыя атрымала шанец пераняць уладу

Раней і кіраўнік «Права і справядлівасьці» Яраслаў Качынскі, і лідэр «Грамадзянскай кааліцыі» Дональд Туск ужо заявілі, што задаволеныя вынікамі выбараў і гатовыя сфармаваць урад з кааліцыйнымі партнэрамі.