Ярданія заявіла, што любы крок Ізраілю па прымусе новага перасяленьня палестынцаў падштурхне рэгіён да «бездані» больш шырокага рэгіянальнага канфлікту. Ягоныя словы прыводзіць агенцтва Reuters.
Міністар замежных спраў Айман Сафадзі таксама заявіў, што блякіроўка Ізраілем гуманітарнай дапамогі Газе і прымус яе жыхароў пакінуць свае дамы ў сувязі з эскаляцыяй ваенных дзеяньняў зьяўляюцца «абуральным» парушэньнем міжнароднага права. Раней Ізраіль даў насельніцтву поўначы сэктару Газа крайні тэрмін для перамяшчэньня на поўдзень напярэдадні чаканага наземнага наступу па выкараненьні баевікоў ХАМАС.
У Тэль-Авіве сказалі, што будуць трымаць дзьве дарогі адкрытымі да 16:00, каб дазволіць людзям выехаць. У той жа час напярэдадні ў шэрагу СМІ зьяўляліся паведамленьні аб тым, што ХАМАС ставіць адмысловыя загароды, каб абмежаваць унутраную міграцыю насельніцтва на поўдзень сэктару Газа.
Сафадзі сказаў, што ваенная кампанія супраць ХАМАС вядзе да гібелі ні ў чым не вінаватых мірных жыхароў і прынясе за сабой адчай і разбурэньні, якія не прынясуць бясьпекі Ізраілю.
«Вайна вядзе да гібелі і выцясьненьня нявінных палестынцаў і пакіне рэгіён і сьвет перад наступствамі атмасфэры разбурэньня і адчаю, якую Ізраіль створыць у Газе», — сказаў Сафадзі пасьля сустрэчы са сваім канадзкім калегам.
ГЛЯДЗІЦЕ ТАКСАМА: Дзяржсакратар ЗША пасьля Ізраілю наведвае краіны Блізкага Ўсходу. Правёў сустрэчу зь лідэрам Палестыны і каралём ЯрданііІмкненьне Ізраілю прымусіць усё насельніцтва пакінуць свае дамы было «чырвонай лініяй», зь якой сутыкнуліся арабы, сказаў Сафадзі.
«Гэта прывядзе рэгіён у пекла вайны... мы павінны пакласьці канец гэтаму вар’яцтву», — дадаў ён.
Працяг вайны таксама пагражае яе распаўсюджваньнем на іншыя франты, сказаў Сафадзі, дадаўшы, што «гвалт спародзіць больш гвалту і разбурэньняў».
Кароль Ярданіі Абдала накіраваўся 14 кастрычніка ў Эўропу дзеля актывізацыі дыпляматычных намаганьняў пад кіраўніцтвам каралеўства, якія, па словах Сафадзі, накіраваныя на атрыманьне падтрымкі для спыненьня надыходзячай гуманітарнай катастрофы ў Газе і прадухіленьня больш шырокага канфлікту.
Манарх сказаў дзяржаўнаму сакратару ЗША Энтані Блінкену ў Амане 13 кастрычніка, што прыярытэтам зьяўляецца абарона мірных жыхароў з абодвух бакоў і забесьпячэньне таго, каб Ізраіль дазволіў тэрміновую дапамогу Газе. Кароль таксама падкрэсьліў адмову Ярданіі прыняць перасяленьне палестынцаў зь іх зямлі.
Ярданія, якая страціла Заходні бераг ракі Ярдан, уключаючы Ўсходні Ерусалім, на карысьць Ізраілю падчас вайны на Блізкім Усходзе 1967 году, непакоіцца, што пашырэньне гвалту можа мець наступствы з-за таго, што вялікую долю насельніцтва Ярданіі складаюць палестынцы.
ГЛЯДЗІЦЕ ТАКСАМА: Армія абароны Ізраіля заявіла пра гатоўнасьць пачаць наземную апэрацыю ў сэктары ГазыВайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.