Міністар абароны Ізраілю Яаў Галант абвясьціў аб пераходзе сілаў абароны краіны ў поўнамаштабны наступ.
«Я зьняў усе абмежаваньні, мы аднавілі кантроль над раёнам, і мы пераходзім у поўнамаштабны наступ. Яны пашкадуюць аб гэтым моманце, Газа ніколі ня вернецца да таго, што было. Той, хто прыйдзе абезгалоўліваць, забіваць жанчын, людзей, якія перажылі Галакост, — мы зьнішчым яго ўсімі сіламі і без кампрамісаў», — працытавала выказваньне ізраільскага міністра мясцовае выданьне The Times of Israel.
ГЛЯДЗІЦЕ ТАКСАМА: Прэзыдэнт ЗША назваў дзеяньні ХАМАС «чыстым і бяспрымесным злом»Агенцтва Associated Press паведаміла, што агульная колькасьць ахвяраў з двух бакоў ужо перавысіла 2 тысячы. У Ізраілі загінулі больш за 1200 чалавек, у тым ліку 155 вайскоўцаў, а ў Газе — 900 чалавек, у тым ліку 260 дзяцей і 230 жанчын. У Ізраілі заявілі, што сярод іх сотні байцоў ХАМАС. Тысячы параненыя з абодвух бакоў.
У Ізраілі паведамілі, што баевікі ХАМАС выкралі больш за 150 ізраільцаў. Узброеная групоўка ХАМАС папярэдзіла, што будзе забіваць аднаго з закладнікаў кожны раз, калі ізраільскія вайскоўцы без папярэджаньня будуць бамбіць цывільныя аб’екты ў Газе.
Армія абароны Ізраілю паведаміла, што за апошнія суткі нанесла больш за 450 удараў па пазыцыях ХАМАС у сэктары Газа.
Больш за 263 тысячы чалавек былі вымушаныя пакінуць свае дамы ў сэктары Газа, паведамляе Ўправа ААН па каардынацыі гуманітарных пытаньняў. Паводле палестынскіх уладаў, у выніку ўдараў з боку Ізраілю было разбурана больш за 1000 адзінак жыльля, а 560 сталі непрыдатнымі для пражываньня.
З прычыны недахопу паліва ў сэктары Газа 11 кастрычніка спыніла працу адзіная электрастанцыя. Паколькі пастаўкі электраэнэргіі з Ізраілю спыненыя, адзінай крыніцай электрычнасьці ў сэктары Газа пакуль застаюцца дызэль-генэратары, на колькі хопіць запасаў паліва для іх — невядома. ААН лічыць, што гэта можа прывесьці да гуманітарнай катастрофы ў рэгіёне.
З 9 кастрычніка Ізраіль блякуе сэктар Газа, адключыўшы электрычнасьць і ваду, а таксама перакрыўшы пастаўкі харчаваньня і паліва. Цяпер мясцовыя жыхары практычна ня могуць пакінуць рэгіён. У ААН заявілі, што блякада сэктару Газа парушае міжнароднае права. «Увядзеньне аблогі, якая ставіць пад пагрозу жыцьцё мірных жыхароў і пазбаўляе іх тавараў, неабходных для іх выжываньня, забаронена міжнародным гуманітарным правам», — сказаў Вярхоўны камісар ААН у правах чалавека Фолькер Цюрк.
ГЛЯДЗІЦЕ ТАКСАМА: Кіраўнік дыпляматыі Эўразьвязу: «Караць усіх палестынцаў — няслушна, гуманітарная дапамога аўтаноміі працягнецца»- Раніцай 7 кастрычніка палестынская радыкальная групоўка ХАМАС атакавала Ізраіль.
- З сэктару Газа прарваўся дэсант, які пачаў захопліваць паселішчы, браць закладнікаў і расстраляў шмат людзей проста на вуліцах.
- 8 кастрычніка да атакі падключыліся радыкальныя ісламісты зь Лібану.
- Уварваньне з тэрыторыі Газы адбылося ў 50-ю гадавіну пачатку вайны Суднага дня 1973 году.
Вайна Ізраіля з ХАМАС. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.