Хроніка перасьледу 6 кастрычніка: у Гомлі затрымалі лідэра гурту Krumkač, у Віцебску пакаралі за абразу Лукашэнкі ў тралейбусе

Як стала вядома праваабаронцам «Вясны», 5 кастрычніка ў Гомлі затрымалі музыку, заснавальніка і лідэра блэк-мэтал гурту Krumkač Арцёма Раманава. Прычына затрыманьня невядомая.

На пачатку красавіка Раманава ўжо затрымлівалі. Тады Арцёму прызначылі 10 дзён арышту нібыта за «распаўсюд экстрэмісцкіх матэрыялаў». Тады ж на «сутках» сядзеў і музыка гурту Аляксандар Кубышкін.

Віцябляніна пакаралі калёніяй за абразу Лукашэнкі ў тралейбусе

Суд Кастрычніцкага раёну Віцебска 4 кастрычніка вынес прысуд мясцоваму жыхару Сяргею Бельскаму, абвінаваціўшы яго ў абразе Аляксандра Лукашэнкі (ч. 1 арт. 368 Крымінальнага кодэксу). Справу разглядаў судзьдзя Сяргей Будрэвіч, піша «Вясна».

Згодна з матэрыяламі справы, Сяргей Бельскі 6 ліпеня 2023 года, нібыта нападпітку, «знаходзячыся ў грамадзкім месцы — у салёне тралейбуса, які рухаўся па маршруце № 12 ...у прысутнасьці сьведак публічна абразіў, гэта значыць прынізіў гонар і годнасьць асобы Лукашэнкі, прамовіўшы неаднаразова выказваньні ў яго адрас, якія зьмяшчалі нэгатыўную ацэнку і мелі ненарматыўную форму маўленчага выказваньня, прыніжалі аўтарытэт, гонар і годнасьць асобы».

Кантралёр грамадзкага транспарту, які правяраў квіткі ў пасажыраў, выклікаў міліцыю.

Суд прызначыў яму пакараньне ў выглядзе пазбаўленьня волі на 2 гады 6 месяцаў з адбываньнем прызначанага пакараньня ў папраўчай калёніі ва ўмовах строгага рэжыму.

Пэнсіянэрку з анкалёгіяй асудзілі да калёніі за камэнтары

2 кастрычніка ў судзе Бабруйска і Бабруйскага раёну вынесьлі прысуд 62-гадовай Але Зуевай, піша «Вясна». Яе прызналі вінаватай паводле арт. 369 (абраза прадстаўніка ўлады) і ч. 1 арт. 368 (абраза Лукашэнкі) і асудзілі да двух з паловай гадоў калёніі ва ўмовах агульнага рэжыму. Вырак агучыў судзьдзя Павел Карцінін.

У Алы Зуевай анкалягічнае захворваньне крыві.

Яе абвінавацілі ў тым, што цягам 2 гадоў жанчына пакідала камэнтары ў Тэлеграме. Яны нібыта ўтрымлівалі абразы Лукашэнкі і супрацоўнікаў міліцыі і «ненарматыўную лексыку і выказвалі нэгатыўную ацэнку ў бок прадстаўнікоў улады».