Пуцін: Расея прапаноўвала Армэніі пакінуць два раёны Карабаху

Пра гэта заявіў прэзыдэнт Расеі Ўладзімір Пуцін падчас выступленьня на форуме «Валдай». Пра якія два раёны ішла размова, Пуцін не паведаміў.

Пуцін таксама адзначыў, што навядзеньне парадку ў самаабвешчаным Нагорным Карабаху было пытаньнем часу.

Акрамя таго, Пуцін пракамэнтаваў словы кіраўніка Эўрапейскай Рады Шарля Мішэля, што Расея здрадзіла армянскаму народу. «Чыя б кабыла мычала, а твая б маўчала», — сказаў Пуцін. На заўвагу мадэратара, што ў прымаўцы гаворыцца пра карову, выступоўца адказаў: «Карова, кабыла — ня важна. Жывёла, карацей».

Паводле Пуціна, у расейскага кантынгенту ў Нагорным Карабаху была задача весьці маніторынг рэжыму спыненьня агню.

Ён таксама адзначыў, што ў адносінах да арыштаваных былых лідэраў непрызнанага рэгіёну Баку будзе зыходзіць зь меркаваньняў гуманітарнага права.

Раней сёньня Эўрапарлямэнт прыняў рэзалюцыю, у якой асудзіў ваенную апэрацыю азэрбайджанскай арміі ў Нагорным Карабаху 19 верасьня. У заяве дзеяньні Азэрбайджану называюцца неапраўданым і загадзя сплянаваным нападам, а масавы вымушаны ад’езд армян параўноўваецца з этнічнай чысткай.

Акрамя таго, парлямэнтары абвінавацілі Азэрбайджан у парушэньні правоў чалавека і заклікалі ЭЗ перагледзець адносіны з Баку, у тым ліку зьнізіць залежнасьць ад імпарту азэрбайджанскіх энэргарэсурсаў.

• Карабах паводле міжнароднага права лічыцца часткай Азэрбайджану. Насельніцтва рэгіёну пераважна складалі армяне. З пачатку 1990-х гадоў Баку не кантраляваў большую частку тэрыторыі, там была абвешчаная Нагорна-Карабаская Рэспубліка, не прызнаная ніводнай краінай сьвету.
• 19 верасьня Азэрбайджан у выніку аднадзённай ваеннай апэрацыі прымусіў урад непрызнанай дзяржавы капітуляваць. У Баку гэта назвалі аднаўленьнем сувэрэнітэту.
• Армянскае насельніцтва рэгіёну, баючыся перасьледу, масава пакінула свае дамы. Паводле ацэнкі ААН, у рэгіёне за некалькі тыдняў засталося не больш за тысячу з 120 тысячаў армян, якія пражывалі там.
• Азэрбайджанскія ўлады заклікалі жыхароў застацца ў рэгіёне і заявілі пра гатоўнасьць весьці перамовы аб рэінтэграцыі армянскага насельніцтва Карабаху.