Пра гэта падчас брыфінгу расказаў навуковы супрацоўнік BEROC Анатоль Харытончык, піша «Зеркало».
Эканаміст Анатоль Харытончык лічыць, што ў кастрычніку інфляцыя «рэзка паскорыцца». Ён тлумачыць гэта тым, што летась якраз у той жа месяц было зьніжэньне ўзроўню спажывецкіх цэнаў на 1 працэнт праз увядзеньне жорсткага рэгуляваньня.
У кастрычніку летась спачатку Аляксандр Лукашэнка сваім указам забараніў зьмяняць цэны, а бліжэй да канца месяца ўрад прыдумаў новы мэтад іх рэгуляваньня, які з асобнымі зьменамі дзейнічае дагэтуль.
«Таму нават калі цэны ў кастрычніку ня зьменяцца, гэта дадасьць нам да агульнай гадавой інфляцыі адзін працэнтны пункт, — цытуе эканаміста „Зеркало“. — Хутчэй за ўсё, мы ў верасьні ўбачым мінімум гадавой інфляцыі, магчыма, крыху ніжэйшы за 2%, а ў кастрычніку адбудзецца досыць моцны рост».
На ягоную думку, да канца года інфляцыя адбудзецца ў дыяпазоне 5–7 працэнтаў. Варта адзначыць, што прыкладна такі ўзровень інфляцыі прагназавалі ўлады паводле вынікаў 2023 году.
У жніўні ў Беларусі была зафіксаваная дэфляцыя на ўзроўні 0,3%. «Гэтаму спрыяла патаньненьне садавінагародніннай прадукцыі, а таксама асобных імпартаваных тавараў, — адзначалі раней у Міністэрстве эканомікі. — І ёсьць усе падставы меркаваць, што ў выніку года ўзровень інфляцыі акажацца ніжэйшым за прагназаваны».
Раней у міністэрстве папярэдзілі беларусаў, каб рыхтаваліся да росту цэнаў. Там лічылі, што гадавая інфляцыя будзе на ўзроўні 7 працэнтаў, як і прагназавалася.
ГЛЯДЗІЦЕ ТАКСАМА: Беларусь апярэдзіла Ўкраіну, якая ваюе, у росьце спажывецкіх цэнаў з пачатку году ГЛЯДЗІЦЕ ТАКСАМА: «Раней мне хапала 800 рублёў, цяпер трэба 1200-1500». Як інфляцыя павялічвае кошт перадач для вязьняў