Па характэрных дэталях можна вызначыць, што на здымку — вялікі дэсантны карабель (верагодна, «Минск»): ракета трапіла ў палубную надбудову, якая амаль цалкам правалілася ўсярэдзіну карабля.
List Of Naval Losses During The Russian Invasion Of #Ukraine 🇷🇺🇺🇦Updated with:- Visual confirmation now indicates that the Ropucha-class landing ship Minsk has been destroyed, not merely damaged.Full list: https://t.co/eoL6IvH6Ay pic.twitter.com/5kUmizlZ1y
— Oryx (@oryxspioenkop) September 13, 2023
Рэсурс Oryx, які займаецца падлікам пашкоджанай і зьнішчанай у вайне ва Ўкраіне ваеннай тэхнікі, на падставе фота зрабіў выснову, што дэсантны карабель «Минск» быў зьнішчаны, а ня проста пашкоджаны.
Мінабароны Расеі заявіла, што два караблі, пашкоджаныя падчас удару, будуць адрамантаваныя. Афіцыйна не паведамлялася, якія менавіта караблі былі пашкоджаныя. Украінскія і расейскія СМІ, аднак, паведамляюць, што гаворка ідзе пра БДК «Минск», а таксама пра падводную лодку «Ростов-на-Дону». Як адзначае выданьне Defense Express, калі вялікія дэсантныя караблі расейскага Чарнаморскага флёту ўжо рабіліся цэльлю ўкраінскіх удараў, то субмарына разьбітая ўпершыню.
Раней Мінабароны Расеі паведаміла, што ўдар быў нанесены дзесяцьцю крылатымі ракетамі па суднарамонтным заводзе імя Арджанікідзэ і трыма безэкіпажнымі катэрамі па атрадзе караблёў Чарнаморскага флёту. Сьцьвярджаецца, што сродкі СПА зьбілі сем ракет, а патрульны карабель «Василий Быков» (названы так у гонар контр-адмірала Быкава) зьнішчыў усе тры марскія дроны. Астатнія тры ракеты, як заявілі расейскія вайскоўцы, пашкодзілі два караблі, якія стаялі на рамонце.
На відэа, якія публікавалі мясцовыя карыстальнікі сацсетак і інфармацыйныя тэлеграм-каналы, былі відаць і чуваць тры выбухі ў раёне суднарамонтнага заводу. Узьнік пажар. Паводле ўдакладненых дадзеных расейскіх уладаў, загінулі 2 чалавекі, больш за 20 былі параненыя.
Афіцыйна ўкраінскі бок атаку на Севастопаль не камэнтаваў.
Сёньня ж Мінабароны Расеі паведаміла, што ў Чорным моры зьнішчаныя тры катэры УСУ. Паводле паведамленьня ведамства, 13 верасьня тры ўкраінскія безэкіпажныя катэры «былі выяўленыя і зьнішчаныя авіяцыяй Чарнаморскага флёта».
Праверыць сьцьвярджэньні як украінскага, так і расейскага боку ва ўмовах актыўных баявых дзеяньняў не ўяўляецца магчымым.
ГЛЯДЗІЦЕ ТАКСАМА: Маск сказаў, што не ўключыў Starlink у Крыме праз санкцыі ЗША ГЛЯДЗІЦЕ ТАКСАМА: Наступны ўкраінскі амбасадар будзе ўручаць даверчыя граматы ўжо новаму прэзыдэнту Беларусі, — палітоляг Магда
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.