Паводле яе, будзе перагледжаны плян падрыхтоўкі да «магчымай радыёлягічнай або ядзернай аварыі на АЭС у Астраўцы [Гарадзенская вобласьць], а таксама мяркуецца ўвесьці «у эксплюатацыю сыстэму апавяшчэньня насельніцтва».
Міністарка падкрэсьліла, што «асьвета насельніцтва» і «гатоўнасьць да надзвычайных сытуацый» застануцца «аднымі з галоўных прыярытэтаў».
Летась на ліквідацыю пагроз ад патэнцыйна небясьпечнай АЭС у Беларусі ўрад Літвы выдзеліў 17,75 млн эўра, сёлета – 36,1 млн. Усяго, паводле ацэнак літоўскага боку, на падрыхтоўку да магчымай аварыі на БелАЭС на працягу пяці гадоў неабходна 91,5 млн эўра.
Вільня пасьлядоўна крытыкуе будаўніцтва атамнай станцыі ў Беларусі, заяўляючы пра непразрысты выбар месца, нявырашаныя праблемы бясьпекі. Літоўскія палітыкі неаднаразова называлі БелАЭС «геапалітычнай зброяй».
- Першы энэргаблёк БелАЭС сілкуе энэргасыстэму з 3 лістапада 2020, яго камэрцыйная эксплюатацыя пачалася ў чэрвені 2021. У чацьвёртым квартале 2023 чакаецца чарговы плянава-папераджальны рамонт блёка. Летась такі рамонт праводзіўся 198 дзён, хаця яго плянавалася завяршыць за 80.
- Другі блёк знаходзіцца на этапе досьледна-прамысловай эксплюатацыі, выдае электраэнэргію ў сетку з 13 траўня. 8 верасьня Дэпартамэнт па ядзернай і радыяцыйнай бясьпецы МНС (Дзяржатамнагляд) правядзе грамадзкія слуханьні ў пытаньні выдачы ліцэнзіі на прамысловае выкарыстаньне блёка. На працягу гэтага месяца пройдуць фінальныя выпрабаваньні, потым камісія павінна зацьвердзіць акт аб прыёме аб'екта ў эксплуатацыю. Пасьля гэтага будаўніцтва АЭС будзе лічыцца завершаным.