Ва Ўкраіне шэраг тэлеграм-каналаў, у тым ліку зьвязаны з Узброенымі сіламі Ўкраіны «Оперативний ЗСУ» паведамілі аб пападаньні адразу ў некалькі вайсковых аб’ектаў на тэрыторыі акупаванага Расеяй Крыму.
«У Крыме пашкоджаны берагавы ракетны супрацькарабельны комплекс „Бастыён“. Ён зьяўляецца адным з носьбітаў ракет „Онікс“, якімі расейцы наносяць удары па Ўкраіне. Таксама пашкоджаныя радыёлякацыйныя станцыі. Усяго адбылося 7 выбухаў», — адзначаецца ў паведамленьні.
Тэлеграм-канал «Крымский ветер» удакладніў, што комплекс «Бастыён» знаходзіўся на мысе Тарханкут, а зьнішчаная радыёлякацыйная станцыя 48Я6-К1 «Падлёт» магла выяўляць паветраныя цэлі на малой і вельмі малой вышыні ва ўмовах спэцыяльных радыёперашкод. Гэтая станцыя выдавала цэлі для расейскіх ЗРК С-300 і С-400.
Пазьней ўкраінская вайсковая выведка паведаміла, што а 10-й раніцы 23 жніўня недалёка ад вёскі Аленеўкі на мысе Тарханкут «адбыўся выбух, які зьнішчыў расейскую зэнітна-ракетную сыстэму вялікага і сярэдняга радыюсу дзеяньня С-400 «Трыюмф».
Разам з устаноўкай былі зьнішчаны ўсе ракеты, якія былі на ёй усталяваныя, і асабовы склад.
«Улічваючы абмежаваную колькасьць такіх комплексаў на ўзбраеньні ворага, гэта адчувальны ўдар па сыстэме СПА акупантаў, які будзе мець сур'ёзны ўплыў на далейшыя падзеі ў акупаваным Крыме», ― адзначаецца ў афіцыйным паведамленьні ўкраінскай выведкі.
У Маскве ад дронаў зноў пацярпеў бізнэс-цэнтар
Мэра Масквы Сяргей Сабянін раніцай 23 жніўня паведаміў, што ўначы ў выніку новай атакі дронамі пацярпеў будынак, які будуецца ў «Маскве-Сіці». Яшчэ два бесьпілётнікі нібыта зьбілі супрацьпаветраныя сродкі. Папярэдне ніхто не пацярпеў. Але ў суседніх пяціпавярховых будынкаў павыляталі шыбы.
Міністэрства абароны Расеі паведаміла, што ўдзень 23 жніўня яшчэ адзін дрон зьбілі на Белгарадзкай вобласьцю.
Аб атаках на вайсковыя аб’екты ў Крыме пакуль нічога не паведамляюць.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.