У Аўстраліі і Новай Зэляндыі завяршыўся чэмпіянат сьвету ў футболе сярод жанчын. У фінальным матчы зборная Гішпаніі перамагла каманду Англіі зь лікам 1:0.
Гішпанская жаночая каманда ўпершыню стала чэмпіёнам сьвету. Сярод мужчын Гішпанія выйгравала першынство ў 2010 годзе.
Адзіны гол у фінальным матчы забіла Вольга Кармона з «Рэала» (Мадрыд). Большая частка футбалістак асноўнага чэмпіёнскага складу гуляюць за «Барсэлёну».
Цяперашні чэмпіянат сьвету ў футболе сярод жанчын — дзявяты па ліку. Часьцей за ўсё першынство выйгравала зборная ЗША. На гэты раз яна нават не змагла выйсьці ў чвэрцьфінал.
Трэцяе месца заняла каманда Швэцыі, чацьвёртае — Аўстраліі. У першынстве ўпершыню ўдзельнічалі 32 каманды, у тым ліку зборныя краін, якія ніколі не дабіваліся вялікіх посьпехаў у мужчынскім футболе — Філіпін, Віетнама, Гаіці, Замбіі і іншых.
ГЛЯДЗІЦЕ ТАКСАМА: Расейскі пасол у Менску заявіў, што напад на Беларусь Масква будзе разглядаць як напад на сябе