Крысьціна Ціманоўская ў першым афіцыйным старце за Польшчу на чэмпіянаце сьвету не прабілася ў паўфінал у бегу на 100 мэтраў

Беларуская лёгкаатлетка выступае за Польшчу на Чэмпіянаце сьвету ў лёгкай атлетыцы, які праходзіць у Будапэшце.

Беларуска Крысьціна Ціманоўская, якая цяпер мае польскае грамадзянства і выступае за Польшчу, паўдзельнічала за новую краіну ў забегу на 100 мэтраў.

У папярэднім забегу Ціманоўская зрабіла фальстарт, гэта значыць, стартавала раней за стрэл. За гэта бягуху папярэдзілі, і ў выпадку другога фальстарту яе выдалялі бы са спаборніцтваў.

З другой спробы спартоўкі стартавалі ўжо без фальстартаў, Ціманоўская лідзіравала ў забегу на 50 мэтрах, аднак на апошніх мэтрах яе апярэдзілі адразу чатыры канкурэнткі. У выніку толькі 5-е месца ў забегу, і Ціманоўская выбыла са спаборнцітваў на гэтай дыстанцыі.

Крысьціна Ціманоўская — першая беларуская спартоўка, якую адхілілі ад спаборніцтваў з палітычных прычынаў і якая дэбютавала на чэмпіянаце сьвету ў складзе іншай каманды пасьля адпаведнага дазволу Міжнароднай фэдэрацыі лёгкай атлетыкі (IAAF).

ГЛЯДЗІЦЕ ТАКСАМА: Крысьціне Ціманоўскай дазволілі выступаць на міжнародных спаборніцтвах за Польшчу

Крысьціна Ціманоўская і яе адмова вяртацца ў Беларусь

1 жніўня 2021 году падчас Алімпіяды 24-гадовая лёгкаатлетка Крысьціна Ціманоўская заявіла, што яе спрабавалі сілай вывезьці з Токіё ў Беларусь. Яна адмовілася ад пасадкі на самалёт і заявіла, што ў аэрапорт яе даставілі супраць волі.
Ціманоўскую выключылі з алімпійскай каманды пасьля таго, як яна выступіла з крытыкай трэнэрскага складу ў сваім Instagram. Яе паставілі бегчы эстафэту 4×400 мэтраў, хоць на Алімпіядзе Крысьціна рыхтавалася выступіць у бегу на 100 і 200 мэтраў.
Гэта здарылася пасьля таго, як Марыю Жодзік, Ганну Міхайлаву і Крысьціну Мулярчык не дапусьцілі да эстафэты з прычыны недастатковай колькасьці допінг-пробаў. Жодзік абвінаваціла ў гэтым Беларускую фэдэрацыю лёгкай атлетыкі. Ціманоўская, у сваю чаргу, заявіла, што ніколі ня бегала дыстанцыю, на якую яе без папярэджаньня выстаўляе трэнэрскі штаб.
Неўзабаве пачаліся пагрозы ад адміністрацыі каманды і галоўнага трэнэра зборнай у лёгкай атлетыцы Юрыя Маісевіча. Функцыянэры спачатку ігнаравалі пытаньні Ціманоўскай наконт удзелу ў няпрофільнай для яе эстафэце, куды атлетку ўключылі безь яе згоды, а затым пачалі пагражаць, заяўляючы, што рашэньне пра яе «выдаленьне з Алімпіяды» прынятае «на самым версе». Крысьціна апублікавала, а потым выдаліла аўдыязапіс з пагрозамі.
Ціманоўская заявіла, што ў Беларусь ня вернецца, бо баіцца перасьледу. 2 жніўня яна прыйшла ў польскую амбасаду, дзе ёй выдалі гуманітарную візу. У той жа дзень стала вядома, што яе муж Арсень Зданевіч зьехаў зь Беларусі ва Ўкраіну.
Трэцяга жніўня Ціманоўская з Токіё паразмаўляла з прэм’ер-міністрам Польшчы Матэвушам Маравецкім.
4 жніўня быў заплянаваны пералёт спартоўкі ў Варшаву, у апошні момант зь меркаваньняў бясьпекі Варшаву зьмянілі на Вену. У аэрапорце Токіё перад вылетам у Аўстрыю Ціманоўская зьявілася ў суправаджэньні афіцэраў японскай паліцыі.
5 жніўня Ціманоўская прыбыла ў Варшаву і дала прэсавую канфэрэнцыю.
6 жніўня Міжнародны алімпійскі камітэт паведаміў, што «ў інтарэсах дабрабыту спартоўцаў Беларусі» скасаваў акрэдытацыю двух трэнэраў Ціманоўскай, Артура Шумака і Юрыя Маісевіча, і пачаў расьсьледаваньне інцыдэнту.
10 жніўня Крысьціна Ціманоўская падпісала кантракт са спартовай групай Orlen. У польскай камандзе адзначылі, што спадзяюцца на хуткае аднаўленьне кар’еры беларускі.