Міністэрства абароны Польшчы ўказала патэнцыйныя месцы разьмяшчэньня польскіх аэрастатаў праекту «Барбара», якія павінны выяўляць аб’екты, якія нізка лётаюць, зь вялікіх адлегласьцяў, паведамляе партал Polon.pl са спасылкай на польскае Мінабароны.
Аэрастаты — вялікія паветраныя шары, напоўненыя, напрыклад, геліем, якія могуць падымацца на вышыню больш за 4000 мэтраў. Іх прывязваюць адмысловымі тросамі і расьцяжкамі. Аэрастат абсталяваны спэцыялізаваным радарам, які дазваляе бесьперапынна назіраць за космасам на адлегласьці больш за 300 км і выяўляць цэлі, якія рухаюцца на малых вышынях: напрыклад, бесьпілётнікі, верталёты, невялікія самалёты, крылатыя ракеты ці іншыя аб'екты паветранай пагрозы.
Згодна з інфармацыяй у рамках працэдуры RFI (Request for Information), накіраванай у ЗША, Польшча плянуе набыць да чатырох выведных аэрастатаў. Тры зь іх павінны кантраляваць усходнія і паўднёва-ўсходнія межы Польшчы, яшчэ адзін — ахоўваць раён Калінінграду і частку Балтыйскага мора.
Патэнцыйныя месцы для ўсталяваньня радараў: ваколіцы гораду Седльцэ (Мазавецкае ваяводзтва, каля 100 км ад Берасьця), вёскі Шчэпанкова (Вармінска-Мазурскае ваяводзтва, непадалёк ад Калініграду), Карбоўскае (Вармінска-Мазурскае ваяводзтва, прыкладна ў 80 км ад Сувалкскага калідору), вёска Кужына Велька (Падкарпацкае ваяводзтва, ля ўкраінскай мяжы, прыкладна ў 150 км ад Львова).
Апроч саміх аэрастатаў, маюць пабудаваць адпаведную інфраструктуру, якая суправаджае такія аб’екты. Як піша выданьне, згодна з прадстаўленымі плянамі, першыя радыёлякацыйныя станцыі маюць пабудаваць на працягу 14 месяцаў з моманту падпісаньня кантракту, сыстэма павінна выйсьці ў пачатковую апэратыўную гатоўнасьць да 2025 году.
ГЛЯДЗІЦЕ ТАКСАМА: Польская армія пачала апэрацыю «Rengaw» на мяжы зь БеларусьсюРаней Польшча заявіла пра перакіданьне каля 10 тысяч вайскоўцаў у падмацаваньне аховы польска-беларускай мяжы. Гэта было зьвязана з актыўнасьцю ПВК у Беларусі і вучэньнямі вагнэраўцаў каля польскай мяжы.