Як заявіў прэзыдэнт Украіны Ўладзімір Зяленскі, увечары 5 жніўня армія РФ нанесла ўдар кіраванай авіябомбай па цэнтры пераліваньня крыві ў Купянскім раёне Харкаўскай вобласьці. Паводле Зяленскага, «ёсьць загінулыя і параненыя», «ратавальнікі ліквідуюць пажар».
Як пазьней паведаміў старшыня Харкаўскай абласной вайсковай адміністрацыі Алег Сінягубаў, удар нанесьлі каля 20:20 па нежылым памяшканьні ў вёсцы Круглякаўка Купянскага раёну. Адбыўся маштабны пажар. Паводле папярэдніх зьвестак, загінулі двое мужчын, яшчэ чатыры чалавекі параненыя, заявіў Сінягубаў.
У Хмяльніцкай вобласьці ў выніку ракетнага ўдару пашкоджаныя некалькі жылых дамоў, установа культуры і аўтавакзал. Як заявілі ў абласной вайсковай адміністрацыі, пацярпелых няма. У Сумскай вобласьці разбураны жылы дом, загінуў адзін чалавек.
ГЛЯДЗІЦЕ ТАКСАМА: Украінская выведка: Расея магла імітаваць пускі ракет зь Беларусі, каб уцягнуць яе ў вайнуПаводле зьвестак Паветраных сіл УСУ, войска РФ прымяніла 70 бесьпілётнікаў і ракет. 30 крылатых ракет і 27 ударных дронаў зьбілі ўкраінскія вайскоўцы.
У прыватнасьці, у атацы ўвечары 5 жніўня расейскія войскі выкарысталі 14 крылатых ракет «Калібр», 12 зь іх зьбілі. Інфармацыю пра колькасьць «Кінжалаў» УСУ не раскрылі.
Уначы расейскія вайскоўцы выпусьцілі па Ўкраіне ўдарныя дроны «Шахед» з паўднёвага ўсходу, «Калібры» з акваторыі Чорнага мора і ракеты Х-101/Х-555 з самалётаў стратэгічнай авіяцыі Ту-95МС з раёну Касьпію. Паведамляецца, што сілы СПА зьнішчылі ўсе 27 «Шахедаў» і 13 з 20 ракет Х-101/Х-555.
ГЛЯДЗІЦЕ ТАКСАМА: Украіна нанесла чарговы ўдар раёне Крымскага мосту. Пашкоджаны расейскі танкер