Усю сям’ю затрымалі за лайкі і падпіску на «экстрэмісцкія каналы»
У Гомлі затрымалі цэлую сямʼю — пажылых мужа і жонку, іх дачку і зяця, паведаміў адзін з тэлеграм-каналаў сілавікоў. Ім пагражае адміністрацыйны артыкул за распаўсюд «экстрэмісцкіх» матэрыялаў.
Сілавікі апублікавалі відэа гамельчукоў.
Усіх чацьвярых плянуюць судзіць паводле артыкулу 19.11 КаАП («Распаўсюд экстрэмісцкіх матэрыялаў»).
ГУБАЗіК затрымаў, а пасьля адпусьціў пад падпіску аб нявыезьдзе шахматыста Буланава
У Берасьці затрымалі шахматыста, майстра ФІДЭ Дзьмітрыя Буланава. Ролік зь беларусам апублікаваў блізкі да сілавікоў тэлеграм-канал.
На відэа Буланаў расказвае, што ён прафэсійны шахматыст і ўваходзіць у 30 найлепшых, што ўдзельнічаў у акцыях пратэсту 2020 году, удзельнічаў у перасылцы «экстрэмісцкіх матэрыялаў» і быў зарэгістраваны ў пляне «Перамога».
Буланаў — адзін з удзельнікаў каманды «Свабодныя шахматысты Беларусі». Самога Буланава адпусьцілі пад падпіску аб нявыезьдзе пасьля трох дзён арышту. У чым абвінавачваюць шахматыста і ці заведзеная на яго справа, невядома.
У Берасьці затрымалі лекара-ўроляга Алега Зыкуна
У Берасьці 25 ліпеня затрымалі лекара-ўроляга абласной бальніцы Алега Зыкуна, паведаміла ініцыятыва мэдыкаў «Белыя халаты».
Паводле «Белых халатаў», паўгода таму яго затрымлівалі за данаты, абавязалі выплаціць матэрыяльную дапамогу дзіцячаму дому ў шматразовым памеры і пакінулі «пад пільнай увагай».
«Цяпер Алег арыштаваны нібыта за тое, што на працоўным кампутары выявілі базу з адрасамі і тэлефонамі сілавікоў Берасьця», — паведаміў канал.
Пасьля гэтага затрыманьня ў бальніцы настойліва «рэкамэндуюць» праводзіць тлумачальную працу з пэрсаналам, пагражаюць стратай працоўнага месца зь немагчымасьцю ў далейшым працаўладкавацца з прычыны «дрэннай» характарыстыкі.