Пасьля шэрагу фактаў парушэньня Беларускім Чырвоным Крыжом прынцыпаў Міжнароднай фэдэрацыі Чырвонага Крыжа і Чырвонага Паўмесяца ёсьць дастаткова падстаў для яго выключэньня з гэтай міжнароднай арганізацыі, заявіў упаўнаважаны Вярхоўнай Рады Ўкраіны ў правах чалавека Дзьмітро Лубінец.
Ён зьвярнуўся да міжнароднай фэдэрацыі з просьбай запатрабаваць у БЧК «поўнай інфармацыі пра дзяцей з часова акупаваных тэрыторый Украіны, якія на працягу 2021, 2022 і 2023 гадоў знаходзіліся на «аздараўленьні» і «адпачынках» у Беларусі.
Лубінец адзначыў, што Беларускі Чырвоны Крыж, які зьяўляецца часткай міжнароднага руху Чырвонага Крыжа і Чырвонага Паўмесяца і сябрам аднайменнай Міжнароднай фэдэрацыі, павінен прытрымлівацца місіі і прынцыпаў руху, у прыватнасьці прынцыпу нэўтралітэту.
«Аднак генэральны сакратар Шаўцоў ня толькі ўдзельнічае ў арганізацыі ў Рэспубліцы Беларусь „лягера“ для дзяцей з часова акупаваных тэрыторый Украіны, але і адкрыта „падарожнічае“ на часова акупаваную тэрыторыю Данецкай вобласьці, парушаючы дзяржаўныя межы Ўкраіны. Акрамя таго, ён удзельнічае ў прапагандысцкіх беларускіх тэлепраграмах. Чарговы раз падкрэсьліваю, што эмблему Чырвонага Крыжа выкарыстоўваюць для прыкрыцьця ваенных злачынстваў», — зазначыў Лубінец.
Украінскі Чырвоны Крыж таксама выступіў з афіцыйнай пазыцыяй адносна незаконнай дзейнасьці Беларускага Чырвонага Крыжа на часова акупаваных тэрыторыях Украіны.
Арганізацыя заклікала Міжнародную фэдэрацыю таварыстваў Чырвонага Крыжа і Чырвонага Паўмесяца, Міжнародны камітэт Чырвонага Крыжа і ўсе нацыянальныя таварыствы Чырвонага крыжа і Чырвонага Паўмесяца асудзіць удзел Беларускага Чырвонага Крыжа ў дэпартацыі ўкраінскіх дзяцей і іхных дзеяньняў у межах міжнародна прызнаных дзяржаўных межаў Украіны і разгледзець пытаньне аб выключэньні беларускага Чырвонага Крыжа з міжнароднага руху Чырвонага Крыжа і Чырвонага Паўмесяца.
19 ліпеня з заклікам да Міжнароднага крымінальнага суду выдаць ордэр на арышт Дзьмітрыя Шаўцова выступіў міністар замежных справаў Украіны Дзьмітро Кулеба.
ГЛЯДЗІЦЕ ТАКСАМА: Кіраўнік МЗС Украіны заклікаў Міжнародны крымінальны суд выдаць ордэр на арышт кіраўніка Беларускага Чырвонага КрыжаМіжнародны Чырвоны Крыж адхрысьціўся ад паездак Шаўцова на акупаваны Расеяй Данбас
Міжнародная фэдэрацыя таварыстваў Чырвонага Крыжа і Чырвонага Паўмесяца раскрытыкавала візыт Шаўцова на Данбас.
«Нам не паведамілі пра гэты візыт, і мы ня ўдзельнічалі ні ў якіх мерапрыемствах, уключаючы вываз дзяцей», — паведамілі ў Міжнароднай фэдэрацыі таварыстваў Чырвонага Крыжа.
Міжнародная фэдэрацыя таварыстваў Чырвонага Крыжа і Чырвонага Паўмесяца «надзвычай сур’ёзна ставіцца да дзеяньняў любога з нацыянальных таварыстваў Чырвонага Крыжа або Чырвонага Паўмесяца, якія супярэчаць гуманітарнай місіі арганізацыі, асноватворным прынцыпам і палітыцы».
У сувязі з гэтым IFRC перадала гэтую справу ў Камітэт па выкананьні патрабаваньняў і пасярэдніцтве, які, паводле Канстытуцыі арганізацыі, расьсьледуе і ліквідуе меркаваныя парушэньні добрасумленнасьці.
«Надзвычайныя абставіны гэтага візыту, уключаючы выкарыстаньне сымбаля, які асацыюецца з адным з бакоў міжнароднага ўзброенага канфлікту ва Ўкраіне, закранаюць асноўныя прынцыпы міжнароднага руху Чырвонага Крыжа і Чырвонага Паўмесяца. Візыт і зьвязаныя зь ім мерапрыемствы не былі ўзгодненыя зь іншымі кампанэнтамі руху, як таго патрабуюць нашы ўнутраныя правілы і прадпісаньні.
Гэтыя дзеяньні рызыкуюць падарваць давер да нашай працы ў падтрымцы супольнасьцяў, якія маюць патрэбу, кім бы яны ні былі і па які б бок фронту яны ні знаходзіліся. Вельмі важна, каб усе кампанэнты міжнароднага руху Чырвонага Крыжа і Чырвонага Паўмесяца захоўвалі сваю незалежнасьць ад урадаў і носьбітаў зброі».
Міжнародны офіс паведамляе, што зьвязаўся зь Беларускім Чырвоным Крыжам, каб выказаць заклапочанасьць і спыніць любую падобную дзейнасьць у будучыні, гаворыцца ў заяве.
ГЛЯДЗІЦЕ ТАКСАМА: Міжнародны камітэт Чырвонага Крыжа заявіў, што пачаў разгляд па факце візыту кіраўніка беларускага аддзяленьня ЧК у «ДНР»Што рабіў Шаўцоў на акупаваным Данбасе
Днямі генэральны сакратар Беларускага таварыства Чырвонага Крыжа Дзьмітры Шаўцоў падчас сваёй чарговай паездкі на Данбас перадаў гуманітарную дапамогу і зьняўся ў рэпартажы тэлеканала «Беларусь-1», дзе прызнаўся, што яго арганізацыя бярэ ўдзел у вывазе дзяцей з Украіны. На гэта зьвярнуў увагу сайт «Зеркало».
«Мяне да глыбіні душы абурыў той факт, калі абвінавацілі Беларусь у тым, што мы выкрадаем дзяцей, якія прыяжджаюць да нас на аздараўленьне. І, шчыра кажучы, справа ў тым, што і беларускі Чырвоны Крыж браў у гэтым — і бярэ, і будзе браць — актыўны ўдзел», — заявіў Дзьмітры Шаўцоў.
Падчас сваёй паездкі на акупаваныя ўкраінскія тэрыторыі Шаўцова заўважылі ў камуфляжы і зь літарай Z на рукаве, якую выкарыстоўваюць прыхільнікі расейскай вайны ва Ўкраіне, хоць статут Чырвонага Крыжа патрабуе ад сяброў арганізацыі заставацца нэўтральнымі.
- 18 ліпеня аўтары дакладу Эўрапарлямэнту заклікалі Міжнародны крымінальны суд выдаць ордэр на арышт Аляксандра Лукашэнкі за гвалтоўны вываз дзяцей з акупаваных Расеяй земляў Украіны.
- Раней такі ордэр выдалі на арышт прэзыдэнта Расеі Ўладзіміра Пуціна і ўпаўнаважанай у правах дзіцяці ў РФ Марыі Львовай-Бяловай.