NATO 4 ліпеня падоўжыла кантракт з генэральным сакратаром Енсам Столтэнбэргам яшчэ на год. Гэтым самым альянс вырашыў застацца з дасьведчаным лідэрам, а не спрабаваць дамовіцца аб яго пераемніку падчас вайны ў Эўропе, паведамляе Reuters.
Столтэнбэрг, былы прэмʼер-міністар Нарвэгіі, узначальвае Паўночнаатлянтычны альянс з 2014 года, яго паўнамоцтвы ўжо тры разы падаўжаліся.
31 краіна NATO змагаецца з двайной задачай — падтрымаць Украіну падчас расейскай ваеннай агрэсіі, пры гэтым пазьбягаючы непасрэднага канфлікту паміж сіламі NATO і Расеі.
64-гадовы Столтэнбэрг лічыцца дасьведчаным лідэрам. У твітэры Столтэнберг напісаў, што для яго гонар падоўжыць тэрмін яго паўнамоцтваў да 1 кастрычніка 2024 году.
Honoured by #NATO Allies%27 decision to extend my term as Secretary General until 1 October 2024. The transatlantic bond between Europe & North America has ensured our freedom & security for nearly 75 years, and in a more dangerous world, our Alliance is more important than ever.
— Jens Stoltenberg (@jensstoltenberg) July 4, 2023
«Трансатлянтычная сувязь паміж Эўропай і Паўночнай Амэрыкай гарантуе нашу свабоду і бясьпеку на працягу амаль 75 гадоў, і ва ўсё больш небясьпечным сьвеце наш альянс важнейшы, чым калі-небудзь», — сказаў ён.