«У рамках праграмы досьледна-прамысловай эксплюатацыі на другім энэргаблёку БелАЭС працягваюцца выпрабаваньні сыстэм і абсталяваньня. З 10 чэрвеня будуць праводзіцца дасьледаваньні нэўтронна-фізычных характарыстык актыўнай зоны рэактара блёка са зьніжэньнем яго магутнасьці да мінімальна кантраляванага ўзроўню з адключэньнем ад сеткі», — зазначаецца ў рэлізе.
Этап досьледна-прамысловай эксплюатацыі другога энэргаблёку пачаўся 31 траўня. Ён «прадугледжвае паэтапнае павышэньне магутнасьці рэактарнай устаноўкі энэргаблёку з 50% да 100% з правядзеньнем вялікай колькасьці выпрабаваньняў тэхналягічных сыстэм і абсталяваньня на розных рэжымах работы блёку, у тым ліку з адключэньнем ад сеткі. Усяго такіх выпрабаваньняў будзе больш за 200. Цяпер ідзе ўздым магутнасьці рэактара блёка да 75% ад намінальнай», — адзначалася ў паведамленьні Мінэнэрга з нагоды пачатку этапу.
Этап энэргетычнага пуску другога блёка, які папярэднічаў яму, працягнуўся 56 дзён. 13 траўня аб’ект выдаў у сетку першыя кіляват-гадзіны электрычнасьці. Да 31 траўня было выраблена 170,6 млн кВт·г.
Беларуская АЭС узводзіцца паблізу Астраўца (Горадзенская вобласьць) пераважна за кошт крэдыту Расеі па расейскім праекце ВВЭР-1200. Генэральным праектантам і генпадрадчыкам выступае інжынірынгавая кампанія «АСЭ», якая зьяўляецца галаўной арганізацыяй інжынірынгавага дывізіёну расейскай дзяржкарпарацыі «Росатом».
Пачатак прамысловай эксплюатацыі другога блёку заплянаваны на сёлетні кастрычнік.
- Першы блёк БелАЭС пачаў выпрацоўваць электрычнасьць у рэжыме досьледна-прамысловай эксплюатацыі 3 лістапада 2020 году, у камэрцыйную эксплюатацыю яго ўвялі 10 чэрвеня 2021 году.
- З моманту ўвядзеньня ў прамысловую эксплюатацыю першы энэргаблёк больш прастойваў, чым працаваў: 255 дзён з 488, або звыш 52% часу (па дадзеных на 11 кастрычніка 2022 году).
- У канцы красавіка 2022 году першы энэргаблёк спынілі на рамонт, ён прастойваў паўгода — да 9 лістапада 2022-га.