Пра гэта ён сказаў у відэазвароце, апублікаваным тэлеграм-каналамі Baza і «Осторожно, новости».
На мінулым тыдні прэсавая служба Прыгожына заявіла, што нібыта «вагнэраўцы» пры адыходзе з Бахмута заўважылі, што ў тыле група расейскіх кадравых вайскоўцаў мінуе дарогі. Пры спробе разьміноўваньня «вагнэраўцы» трапілі пад абстрэл, завязаўся бой — і ў выніку найміты захапілі камандзіра 72-й мотастралковай брыгады падпалкоўніка Рамана Вінівіціна.
ГЛЯДЗІЦЕ ТАКСАМА: Уласьнік прыватнай вайсковай кампаніі «Вагнэр» заявіў аб правале «дэмілітарызацыі» ЎкраіныПазьней прэсавая служба ПВК апублікавала відэа допыту вайскоўца. Вінівіцін кажа, што 17 траўня загадаў сваім падначаленым раззброіць і абстраляць машыну з групай наймітаў. Паводле яго слоў, ён зрабіў гэта «праз асабістую непрыязь» і ў стане алькагольнага ап’яненьня.
У сваім відэазвароце Вінівіцін пацьвердзіў, што камандаваў 72-й брыгадай расейскіх войскаў, якая займала пазыцыі на бахмуцкім напрамку. Паводле яго слоў, яго ўзялі ў палон, калі ён абʼяжджаў свае падразьдзяленьні: байцы ПВК «Вагнэр» заступілі яму шлях, а «для гэтага не было ніякіх прававых і іншых падставаў». «Цярпець гэта я, як баявы афіцэр, не зьбіраўся», — сказаў ён, адзначыўшы, што падпарадкоўваецца толькі свайму непасрэднаму начальству.
«У выніку супрацоўнікі ПВК „Вагнэр“ былі раззброеныя і адпраўленыя ў вядомым кірунку, — сьцьвярджае ён. — Пасьля мяне ўзялі ў палон, трымалі ў падвале, зьдзекаваліся так, як ня зьдзекаваўся б любы азлоблены расейскі салдат над палонным салдатам УСУ: мяне зьбілі, не давалі спаць, тры разы за ноч мяне проста выцягвалі з склепа і спрабавалі расстраляць... І вы пасьля гэтага заяўляеце, што я быў затрыманы для правядзеньня сьледчых дзеяньняў?».
ГЛЯДЗІЦЕ ТАКСАМА: Уласьнік расейскай прыватнай вайсковай кампаніі «Вагнэр» заявіў аб пачатку вываду сваіх падразьдзелаў з Бахмута«Напружанасьць» з «вагнэраўцамі», паводле яго слоў, існавала з самага пачатку, як ягоную брыгаду перакінулі на бахмуцкі напрамак. Як сьцьвярджае Вінівіцін, гэта было зьвязана ня толькі з правакаваньнем на канфлікты, «увесьчаснымі пагрозамі „абнуліць“ і „забіць“», але і з «канкрэтнымі дзеяньнямі».
«Мела месца выкраданьне нашых байцоў, дзе супраць іх ужываўся фізычны гвалт, мэтады прыніжэньня гонару і годнасьці. Так, напрыклад, быў выкрадзены старшына аднаго з нашых батальёнаў — яго мучылі, катавалі, голым трымалі на халоднай падлозе ў склепе. Пырскалі ў вочы кіслатой і ўсялякімі хімічнымі рэчывамі, ад якіх ён на час страціў зрок. Аблівалі бэнзінам, падносілі запальнічку. Спрабавалі спаліць», — заявіў ён.
Вінівіцін абвінаваціў Прыгожына ў палітычным піяры, актыўнай дыскрэдытацыі войска і спробах «прадставіць ПВК „Вагнэр“ як адзіную эфэктыўную структуру». Прыгожын пакуль не камэнтаваў гэты відэазварот.