Уласьнік прыватнай вайсковай кампаніі «Вагнэр» Яўгеній Прыгожын заявіў, што Крэмль замест заяўленай у лютым 2022 году «дэмілітарызацыі» Ўкраіны дасягнуў адваротнага эфэкту, а ўкраінскае войска стала адным з наймацнейшых у сьвеце.
«У іх высокі ўзровень арганізацыі, высокі ўзровень падрыхтоўкі, высокі ўзровень выведкі, у іх ёсьць рознае ўзбраеньне, і, больш за тое, яны працуюць на любых сыстэмах — на савецкіх, на натаўскіх, на чым заўгодна — аднолькава пасьпяхова», — сказаў Яўгеній Прыгожын у інтэрвію расейскаму паліткансультанту Канстанціну Далгову.
ГЛЯДЗІЦЕ ТАКСАМА: Прыгожын паведаміў аб узяцьці Бахмута. Украіна заяўляе, што баі працягваюццаУласьнік ПВК «Вагнэр» перакананы, што дзеяньні расейскай арміі прывялі не да тых вынікаў, на якія разьлічвалі ў Крамлі.
Паводле яго, абвешчаная Крамлём «дэнацыфікацыя» (барацьба з «нацысцкім рэжымам», якім у Расеі называюць урад Уладзіміра Зяленскага) зрабіла з украінцаў нацыю, «вядомую ва ўсім сьвеце».
Яўгеній Прыгожын мяркуе, што ва ўзмацненьні баявога патэнцыялу Ўкраіны адыгралі ролю і непісьменныя дзеяньні Расеі. Ён таксама ня выключыў, што «усё можа завяршыцца, як у 1917 годзе (грамадзянскай вайной. — РС) і што могуць паўстаць спачатку расейскія салдаты, а потым іхныя сваякі».
ГЛЯДЗІЦЕ ТАКСАМА: Washington Post: Прыгожын прапаноўваў Украіне перадаць зьвесткі аб пазыцыях расейскіх войскаўЗаснавальнік прыватнай вайсковай кампаніі паведаміў аб вялікіх стратах свайго ўзброенага фармаваньня ў баях ва Ўкраіне з пачатку расейскага ўварваньня.
ПВК «Вагнэр» — расейскае неафіцыйнае ўзброенае фармаваньне, створанае блізкім да прэзыдэнта Ўладзіміра Пуціна пецярбурскім бізнэсоўцам Яўгеніем Прыгожыным. Найміты ПВК, сярод якіх і зьняволеныя, завэрбаваныя ў калёніях, актыўна ўдзельнічаюць у вайне з Украінай, а таксама ў наземных апэрацыях у Сырыі і Афрыцы. Байцоў кампаніі абвінавачваюць у шматлікіх ваенных злачынствах, у тым ліку ў пазасудовых пакараньнях. Прыгожын не адмаўляе гэтага, хаця прамымі словамі і не прызнае. У шэрагу краін ПВК «Вагнэр» прызнана злачыннай і тэрарыстычнай арганізацыяй.
Афіцыйна, паводле расейскіх законаў, ПВК «Вагнэр» не існуе. У зводках Мінабароны падразьдзяленьні наймітаў гэтай структуры называюць «штурмавымі атрадамі добраахвотнікаў».
ГЛЯДЗІЦЕ ТАКСАМА: Прыгожын на фоне трупаў вагнэраўцаў назваў Шайгу «поскудзьдзю» і прыгразіў выхадам з БахмутаВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.