У Беларусі 18 траўня падсумовалі вынікі штогадовага рэспубліканскага агляду населеных пунктаў, які праходзіў у 2022 годзе.
Улады падсумавалі вынікі санітарнага стану і добраўпарадкаваньня населеных пунктаў краіны за 2022 год. Усе гарады былі падзеленыя на катэгорыі. У выніку ўрад пастанавіў прызнаць пераможцамі і ўзнагародзіць пераходным вымпелам і грашовымі прэміямі за кошт сродкаў рэспубліканскага бюджэту наступныя населеныя пункты:
- па І катэгорыі — Берасьце
- па II катэгорыі — Мазыр і Бабруйск
- па III катэгорыі — Жабінка, Маларыта, Глыбокае
- па IV катэгорыі — Брагін, Бялынічы, Чэрыкаў, пасёлак Антопаль Драгічынскага раёна
- па V катэгорыі — вёскі Махро і Ляскавічы Іванаўскага раёна, Дабрамыслі Лёзьненскага раёна, Ахрэмаўцы Браслаўскага раёна, Отар Чачэрскага раёна.
Таксама ўрад адзначыў «значны ўклад у павышэньне ўзроўню добраўпарадкаванасьці тэрыторый» у Бярозе, Петрыкаве, Кобрыне, Полацку, Воршы, Янавічах Віцебскага раёна, Целяханах Івацэвіцкага раёна, Вялікай Бераставіцы, аграгарадках Гарбаха Іванаўскага раёна, Вішоў Бялыніцкага раёна і Туголіца Бабруйскага раёна.
Адпаведны дакумэнт падпісаў прэм’ер-міністар Раман Галоўчанка, піша Наша Ніва са спасылкай на пастанову ўраду.
ГЛЯДЗІЦЕ ТАКСАМА: У якіх гарадах Беларусі найбольш пратэстаў і рэпрэсій. Аналізуем рэйтынг 40 беларускіх гарадоў ГЛЯДЗІЦЕ ТАКСАМА: Дзе ў Беларусі лепш жыць? І куды зьніклі пэнсіянэры? Рэйтынг беларускіх гарадоў за 2022 год ад Цэнтру новых ідэяў ГЛЯДЗІЦЕ ТАКСАМА: Жыць у Менску даражэй, чым у Кіеве, але таньней, чым у Вільні. Экспэрты назвалі самыя дарагія гарады сьвету