Пра гэта паведамляе Zerkalo са спасылкай на тэлеграм-канал «заброшеннаябеларусь».
Паводле інфармацыі канала, рэшткі сьценаў манастыра абваліліся два тыдні таму.
Каменны касьцёл Сьвятой Веранікі і бэрнардынскі кляштар у стылі барока былі пабудаваны ў Селішчы амаль 300 гадоў таму — у 1726 годзе. Манастыр расейскія ўлады закрылі ў 1832-м, а касьцёл — у 1867-м, яго часткова перарабілі ў праваслаўны храм.
Падчас Другой сусьветнай вайны комплекс моцна пацярпеў: адна з вежаў была разбурана, манастырскі корпус згарэў, усё ўнутранае ўбраньне касьцёла страчана. Пасьля вайны іх ніхто не аднаўляў, будынкі працягвалі разбурацца.
У 2000-х улады Беларусі ўключылі комплекс у сьпіс гісторыка-культурных каштоўнасьцей пад другой катэгорыяй. Аднак ніякіх дзеяньняў па кансэрвацыі помніка зроблена не было.
ГЛЯДЗІЦЕ ТАКСАМА: СелішчаЯк адзначае тэлеграм-канал, у каталіцкай япархіі спрабавалі вырашыць пытаньне, але паколькі будынак ня мае даху, праект быў занадта дарагім для япархіі, і ў выніку ад ідэі адмовіліся.
Касьцёл і манастыр павінны былі стаць адной са здымачных лякацый для новай экранізацыі «Чорнага замка Альшанскага» паводле рамана Ўладзіміра Караткевіча. Здымкі мусілі адбыцца ўжо сёлета. Ці зьявіцца зараз касьцёл на кадрах фільма, невядома.
ГЛЯДЗІЦЕ ТАКСАМА: «Беларусьфільм» здыме экранізацыю рамана Караткевіча «Чорны замак Альшанскі» ГЛЯДЗІЦЕ ТАКСАМА: «Мы жывём у часы дзікага паляваньня». Халезін, Хадановіч, Сільчукоў і Падгайская пра бэстсэлер Караткевіча ў лёнданскім тэатры