Да 37-й гадавіны аварыі на Чарнобыльскай атамнай станцыі беларускія апазыцыйныя партыі, актывісты незалежных грамадзкіх арганізацый, прадстаўнікі дыяспар па ўсім сьвеце 19–26 красавіка ладзяць традыцыйную акцыю Чарнобыльскі шлях – 2023, паведамляе «Экадом».
Асноўным лёзунгам селета будзе «Не — ядзернай зброі ў Беларусі».
Акцыя пройдзе ў Вільні, Варшаве і іншых гарадах сьвету. Да Чарнобыльскага шляху далучацца грамадзяне Літвы, Польшчы, дыяспара Ўкраіны. Арганізатары заяўляюць, што ў Менску акцыя праводзіцца ня будзе.
Чарнобыльскі тыдзень, ініцыяваны «Экадомам», праходзіць 19-26 красавіка, гэта сэрыя акцый, мэта якіх — расказаць пра наступствы аварыі на ЧАЭС, а таксама пра небясьпеку выкарыстаньня ядзерных тэхналёгій і прапанаваць альтэрнатыву ядзернай энэргіі.
Акцыі гэтага году прысьвечаны асэнсаваньню, інфармаваньню людзей і абмеркаваньню нямірнага атама з самых розных бакоў, праблемам БелАЭС і пагрозе размяшчэння ядзернай зброі ў Беларусі.
Якія акцыі заплянаваныя?
ВІЛЬНЯ
- 26 красавіка, 18:00, Лукiская плошча.
- 18:00–18:45. Мітынг.
- 18:45–19:30. Шэсьце да амбасады Расеі.
- 19:30–20:00. Выступы, перадача рэзалюцыі.
ВАРШАВА
- 26 красавіка, 18:00, Кракаўскае прадмесьце, помнік Каперніку.
- 18:00–18:45. Мітынг.
- 18:45–19:30. Шэсьце да Рынку Новага Мяста, да помніка Марыі Складоўскай-Кюры.
УРОЦЛАЎ
- Пачатак акцыі ў польскім Ўроцлаве прызначаны на 18:00 побач з гарадзкой ратушай.
БЭРЛІН
- У сталіцы Нямеччыны акцыя заплянаваная на 17:45 ля фрэскі Сахарава на Мюленштрасэ.
КАПЕНГАГЕН
- Акцыя ў сталіцы Даніі пачнецца ў 17:00 на плошчы Крысціянбарг.
ТАРОНТА
- У канадзкім Таронта акцыя павінна пачацца ў 18.30 ля Генэральнага консульства Расеі.