Хроніка перасьледу 19 красавіка: 3 гады калёніі за антываенны допіс у Telegram; песьні яшчэ аднаго гурту прызналі экстрэмісцкімі

Вырак ў Горадні за допіс пра «расейскіх захопнікаў»

У Горадзенскім абласным судзе вынесьлі прысуд у справе 46-гадовага Алега Завадзкага, якога абвінавацілі ў публічнай абразе Аляксандра Лукашэнкі (ч. 1 арт. 368 КК) і ў распальваньні сацыяльнай варожасьці (ч. 1 арт. 130 КК). Справу разглядаў судзьдзя Віталь Кулеш, паведаміла «Вясна».

Мужчына, паводле матэрыялаў абвінавачаньня, разьмясьціў у Telegram публікацыі, у якіх даваў нэгатыўную ацэнку Лукашэнку, а таксама нібыта заклікаў да гвалту ў дачыненьні да расейскіх вайскоўцаў. Ён, сярод іншага, напісаў:

«Расейскія захопнікі, якія ўдзельнічаюць у гвалтоўным захопе чужой дзяржаўнай тэрыторыі ваеннай сілай».

15 лютага КДБ унёс прозьвішча Алега Завадзкага ў сьпіс асобаў, якія нібыта маюць дачыненьне да тэрарыстычнай дзейнасьці.

Чарговае папаўненьне «сьпісу экстрэмісцкіх матэрыялаў»

У абноўлены сьпіс трапілі:

• Сацсеткі Instagram, «Укантакце» і YouTube гомельскага гурту «Дзеці хрушчовак» і апублікаваная там інфармацыя, а таксама песьні гурту «2020», «Таракан», «Папіцот» (рашэньне прыняў суд Цэнтральнага раёну Гомля 11 красавіка);
• Telegram-каналы і чаты «Dzik Pic Chat», «ВАРШАВА БЕЛАРУСЫ ИДЕЙНЫЕ ЛЮДИ», «Алиса рассказывает», «Жлобин Для Жизни Чат», «Partyzanka»;
• Кніга Сяргея Сюзева «Двадцать лет рабства: Беларусь сегодня»;
• Старонкі ў «Одноклассниках» «EX-PRESS.ВY. Добро пожаловать в реальность!», «ЕленаЯнушковская НАСТОЯЩАЯ БЕЛАРУСЬ»; TikTok-акаўнты «YouTube_Belarus», «welcometobelarus2020», «Твой сосед», «Гражданская Реакция», «vuvorit.uа», «Неруссо туристо», «MOST Media», «Змагар».

У Рэчыцы затрымалі вядомага шаржыста

У Рэчыцы затрымалі Анатоля Шчогалева. Ён вядомы сваімі шаржамі на знакамітасцяў і вядзе свой блог, піша «Палеская Вясна».

На відэа, зьнятым сілавікамі, мужчына распавядае, што ў Instagram ён быў падпісаны на «дэструктыўныя тэлеграм-каналы» і «займаўся распаўсюдам дэструктыўнай інфармацыі».

Тэлеграм-канал Рэчыцкага РАУСа паведаміў, што Шчогалеў атрымаў «суткі» па адміністратыўным артыкуле.