Сусьветная фэдэрацыя тхэквандо дазволіла беларускім спартоўцам удзельнічаць у спаборніцтвах у нэўтральным статусе

Фэдэрацыя разгледзела рэкамэндацыі выканкаму Міжнароднага алімпійскага камітэту і дапусьціла да спаборніцтваў спартоўцаў і пэрсанал, пачынаючы з чэмпіянату сьвету ў Баку ў канцы траўня.

«Рашэньне аб удзеле індывідуальных спартоўцаў і дапаможнага пэрсаналу з расейскімі і беларускімі пашпартамі ў нэўтральным статусе ў мерапрыемствах, якія праходзяць не пад эгідай Сусьветнай фэдэрацыі тхэквандо, будзе прынята пасьля чэмпіянату сьвету», — гаворыцца ў паведамленьні арганізацыі.

Будзе створаны спэцыяльны камітэт для праверкі «строгага нэўтралітэту» атлетаў, якія ўдзельнічаюць, і дапаможнага пэрсаналу.

Фэдэрацыя таксама пацьвердзіла свае «заклікі да міру» і «салідарнасьць з алімпійскай супольнасьцю Ўкраіны».

28 сакавіка па выніках пасяджэньня выканкаму ў Лязане (Швайцарыя) МАК выпусьціў заяву, у якой рэкамэндаваў міжнародным фэдэрацыям па відах спорту дазволіць беларусам і расейцам удзельнічаць у міжнародных спаборніцтвах. Аднак агаварыўся, што канчатковае рашэньне застаецца за самімі фэдэрацыямі.

Пры гэтым павінен быць выкананы шэраг умоў. Беларускія і расейскія атлеты змогуць спаборнічаць «у якасьці індывідуальных нэўтральных спартоўцаў» (без выкарыстаньня сьцяга, гімна і сымболікі сваіх дзяржаў) і толькі ў тым выпадку, калі яны «актыўна не займаліся падтрымкай баявых дзеяньняў» і ня маюць дзейных кантрактаў зь сілавымі і вайсковымі ведамствамі сваіх краін.

30 сакавіка Міжнародная фэдэрацыя настольнага тэнісу (ІТТФ) аб’явіла аб згодзе дапусьціць да спаборніцтваў пад сваёй эгідай беларускіх і расейскіх удзельнікаў пры выкананьні імі строгага нэўтралітэту.

Раней стала вядома, што ў тым самым нэўтральным статусе расейцаў і беларусаў дапусьцяць да Ўімблданскага турніру, аднаго з найбольш прэстыжных тэнісных спаборніцтваў у сьвеце.