Польшча перадала Ўкраіне першую партыю зьнішчальнікаў МіГ-29 і рыхтуецца да асаблівага візыту прэзыдэнта Ўкраіны Ўладзіміра Зяленскага ў Варшаву.
«Паводле маёй інфармацыі, гэты працэс ужо завершаны, то бок перадача гэтай першай партыі. Безумоўна, будуць размовы пра магчымую далейшую падтрымку», — сказаў Марцін Пшыдач, кіраўнік Бюро міжнароднай палітыкі прэзыдэнта Польшчы, у эфіры RMF FM.
Паводле яго, у красавіку прэзыдэнт Украіны наведае Варшаву з афіцыйным візытам. Апроч сустрэч з кіраўніцтвам Польшчы Ўладзімір Зяленскі хоча сустрэцца з украінскай дыяспарай Польшчы і польскімі грамадзянамі.
ГЛЯДЗІЦЕ ТАКСАМА: Генштаб Паўночнай Македоніі ўхваліў перадачу Ўкраіне 12 верталётаў Мі-24Варшава стане пятай сталіцай, якую наведае ўкраінскі лідэр з пачатку расейскага ўварваньня ва Ўкраіну. Уладзімір Зяленскі да гэтага часу быў у Вашынгтоне, Лёндане, Парыжы і Брусэлі. Марцін Пшыдач сказаў, што візыт у Польшчу будзе адрозьнівацца тым, што прэзыдэнт Украіны ўпершыню зробіць афіцыйны візыт.
«Гэты візыт будзе шмат у чым асаблівым. Я пакуль не магу гаварыць пра дэталі, але мы рыхтуем шэраг элемэнтаў, якія зробяць гэты візыт асаблівым. Сам факт таго, што гэта будзе афіцыйны візыт, а папярэднія візыты былі выключна працоўнымі, арганізоўваліся непублічна», — дадаў Марцін Пшыдач.
Міхал Дворчык, міністар канцылярыі прэм’ер-міністра Польшчы, удакладніў, што візыт адбудзецца 5 красавіка і гэты дзень украінскі прэзыдэнт сустрэнецца прэмʼер-міністрам Матэвушам Маравецкім.
ГЛЯДЗІЦЕ ТАКСАМА: Славаччына паведаміла пра перадачу Ўкраіне чатырох зьнішчальнікаў МіГ-2923 сакавіка Міністэрства абароны Славаччыны паведаміла аб перадачы Ўкраіне першых 4 з 13 зьнішчальнікаў МіГ-29.
16 сакавіка пра намер перадаць Украіне цягам наступных дзён чатыры баявыя зьнішчальнікі МіГ-29 савецкай вытворчасьці заявіў і прэзыдэнт Польшчы Анджэй Дуда. Імаверна, гаворка ідзе пра зьнішчальнікі, атрыманыя Варшавай ад Чэхіі ў 1995 годзе ў абмен на верталёты польскай вытворчасьці. Цяпер, паводле адкрытых зьвестак, Польшча мае 28 зьнішчальнікаў МіГ-29, са слоў Дуды вынікае, што толькі 16 зь іх у працоўным стане. Частку могуць перадаць на дэталі ці адрамантаваць.
ГЛЯДЗІЦЕ ТАКСАМА: Польшча перадасьць Украіне чатыры баявыя зьнішчальнікі МіГ-29 савецкай вытворчасьціВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.