МВФ заявіў, што дасягнуў пагадненьня на працоўным узроўні з Украінай аб чатырохгадовым пакеце фінансаваньня на суму каля 15,6 млрд даляраў, прапаноўваючы краіне сродкі, неабходныя ёй па меры таго, як украінцы працягваюць змагацца з расейскім уварваньнем.
Пагадненьне, якое яшчэ павінна быць ратыфікавана Радай дырэктараў МВФ, стала вынікам шматмесячных перамоваў паміж фондам і ўкраінскімі ўладамі. МВФ заявіў, што яго выканаўчая рада, як чакаецца, абмяркуе зацьвярджэньне пакета ў найбліжэйшыя тыдні.
Супрацоўнікі МВФ паінфармавалі чальцоў Рады дырэктараў аб пагадненьні, якое стане найбуйнейшым крэдытным пакетам для Ўкраіны з пачатку расійскага ўварваньня, атрымаўшы згоду на пачатак працэсу фінансаваньня, паведаміла агенцтву «Reuters» дасьведчаная крыніца.
У фондзе, не паведамляючы падрабязнасьцяў, заяўляюць, што пагадненьне, як чакаецца, дапаможа разгарнуць буйнамаштабнае фінансаваньне Ўкраіны ад міжнародных донараў і партнэраў. Звычайна крэдыты МВФ адчыняюць доступ да падтрымкі Сусьветнага банку і іншых крэдытораў.
«У наступныя кварталы чакаецца паступовае аднаўленьне эканомікі па меры аднаўленьня актыўнасьці пасьля нанясеньня сур’ёзнай шкоды крытычна важнай інфраструктуры, хоць пагрозы захоўваюцца, уключаючы рызыку далейшай эскаляцыі канфлікту», — гаворыцца ў заяве афіцыйнага прадстаўніка МВФ Гэвіна Грэя.
У цяперашні час у МВФ чакаюць, што зьмяненьне рэальнага валавога ўнутранага прадукту Ўкраіны ў 2023 годзе складзе ад −3% да +1%, дадаў Грэй.
Прэмʼер-міністар Украіны Дзяніс Шмыгаль вітаў пагадненьне і падзякаваў МВФ за падтрымку.
«Ва ўмовах рэкорднага дэфіцыту бюджэту гэтая праграма дапаможа нам прафінансаваць усе крытычныя расходы і забясьпечыць макраэканамічную стабільнасьць, а таксама ўмацаваць наша ўзаемадзеяньне з іншымі міжнароднымі партнэрамі», — напісаў Шмыгаль у сваім тэлеграм-канале.
Міністар фінансаў ЗША Джанэт Елен, якая ў мінулым месяцы нанесла нечаканы візыт ва Ўкраіну, вітала ўгоду пасьля таго, як некалькі месяцаў настойвала на тым, каб МВФ прапанаваў новы пакет фінансаваньня для Ўкраіны.
«Амбіцыйная і належным чынам абумоўленая праграма МВФ мае вырашальнае значэньне для падтрымкі намаганьняў Украіны ў рэфармаваньні, у тым ліку для ўмацаваньня належнага кіраваньня і зьніжэння рызык карупцыі, а таксама для наданьня такой неабходнай фінансавай падтрымкі», — гаворыцца ў заяве.
На мінулым тыдні фонд зьмяніў свае правілы, дазволіўшы новыя крэдытныя праграмы для краін, якія сутыкнуліся з «выключна высокай ступеньню нявызначанасьці», без згадваньня Ўкраіны.
У выпадку ўхваленьня, як і чакалася, крэдыт стане найбуйнейшым крэдытам МВФ для краіны, уцягнутай у актыўны канфлікт.
ГЛЯДЗІЦЕ ТАКСАМА: Дзярждэпартамэнт ЗША: санкцыі дапамагаюць аслабіць расейскую вайсковую моцВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.