У Беларусі штабныя трэнаваньні будуць праводзіцца з улікам досьведу вайны ва Ўкраіне

Міністэрства абароны Беларусі паведаміла аб правядзеньні штабнога трэнаваньня па плянаваньні прымяненьня войскаў Паўночна-заходняга апэратыўнага камандаваньня ў абарончай апэрацыі.

Мэта трэнаваньня, якое праводзіцца згодна з плянам на 2023 год, — павышэньне ўзроўню зладжанасьці на этапе ўхваленьня рашэньня і плянаваньня абарончай апэрацыі.

Вучэньні будуць праходзіць у пунктах сталай дысьлякацыі войскаў.

«Трэнаваньне стане адным з этапаў падрыхтоўкі адказных асобаў органаў кіраваньня войскамі Паўночна-заходняга апэратыўнага камандаваньня, удасканаленьня іх прафэсійных навыкаў [...] на аснове аналізу вынікаў сучасных збройных канфліктаў, у тым ліку і спэцыяльнай ваеннай апэрацыі на тэрыторыі Ўкраіны», — адзначаецца ў паведамленьні Мінабароны Беларусі.

З пачатку расейскага ўварваньня ва Ўкраіну кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.

Нядаўна Аляксандар Лукашэнка заявіў, што Беларусь гатовая далучыцца да расейскай агрэсіі ва Ўкраіне ў выпадку ваеннага інцыдэнту на мяжы і ўварваньня ўкраінскіх салдатаў на беларускую тэрыторыю.

У лютым 2023 году ўрад Беларусі падрыхтаваў законапраект «Аб народным апалчэньні» — як заявіў Лукашэнка, гэта зроблена з улікам «нэгатыўнага ўкраінскага досьведу». У выпадку ваенных дзеяньняў, паводле Лукашэнкі, атрады народнага апалчэньня «могуць трансфармавацца ў партызанскі рух і стаць рэзэрвам для тэрытарыяльнай абароны». У народнае апалчэньне могуць увайсьці 100–150 тысяч чалавек, паведаміў міністар абароны Віктар Хрэнін, пры гэтым ён ня выключыў, што добраахвотнікаў можа быць болей.