ЗША: заява Масквы аб прыпыненьні ўдзелу ў Дамове аб стратэгічных узбраеньнях юрыдычна несапраўдная

Невыкананьне Расеяй Дамовы аб стратэгічных наступальных узбраеньнях (СНУ-3) і заява Масквы аб прыпыненьні выкананьня палажэньняў гэтай дамовы «безадказныя і прыкрыя», гаворыцца ў апублікаванай заяве Дзярждэпартамэнту.

Больш за тое, заява Расеі аб прыпыненьні дзеяньня СНУ-3 юрыдычна несапраўдная. У выніку Расея застаецца зьвязаная сваімі абавязаньнямі па дамове. У Дзярждэпартамэнце падкрэсьлілі, што Злучаныя Штаты па-ранейшаму гатовыя канструктыўна працаваць з Расеяй дзеля поўнага выкананьня дамовы.

У заяве Дзярждэпартамэнту прыводзяцца доказы несапраўднасьці сьцьвярджэньняў Крамля. Расея парушае адразу некалькі палажэньняў СНУ-3, адмаўляючыся, у прыватнасьці, ад правядзеньня праверак, хоць пагадненьне патрабуе, каб кожны бок прымаў 18 інспэкцый у год.

Акрамя таго, Расея адмаўляецца сустракацца ў органе па рэалізацыі дамовы, Двухбаковай кансультацыйнай камісіі (ДКК), нягледзячы на неаднаразовыя просьбы ЗША. Удзел у такіх сустрэчах — яшчэ адно патрабаваньне дамовы.
Расея перастала накіроўваць прадугледжаныя дагаворам апавяшчэньні пра статус і перамяшчэньні сваіх ядзерных сіл. Гэты пункт дамовы гарантуе ўзаемную празрыстасьць і прадказальнасьць абодвух бакоў у адносінах да сваіх стратэгічных ядзерных сіл.

Хоць Злучаныя Штаты лічаць, што ў 2022 годзе Расея не вяла значнай дзейнасьці, якая выходзіць за рамкі дамовы, адмова Масквы дазваляць інспэкцыі і перадаваць апавяшчэньні зьніжае здольнасьць ЗША ацэньваць разгортваньне расейскіх ядзерных узбраеньняў.

У Дзярждэпартамэнце падкрэсьлілі, што Расея можа лёгка выправіць сытуацыю, аднавіўшы выкананьне патрабаваньняў дамовы, як было на працягу многіх гадоў: правядзеньне інспэкцый, правядзеньне сустрэч у КСТР і перадаваньне апавяшчэньняў і даных.

Злучаныя Штаты не адмаўляюць Расеі ў правядзеньні інспэкцый на амэрыканскай тэрыторыі: адразу пасьля зьняцьця абмежаваньняў, зьвязаных з пандэміяй COVID, Вашынгтон даў Маскве зразумець, што расейскія інспэктары могуць бесьперашкодна наведваць аб’екты, якія становяць для іх інтарэс.
У Дзярждэпартамэнце таксама зьняпраўдзілі сьцьвярджэньне Расеі, што дзеяньні ЗША па пераабсталяваньні пускавых установак балістычных ракет падводных лодак (БРПЛ) і цяжкіх бамбавікоў B-52H не адпавядаюць палажэньням СНУ-3.

«Гэтыя сьцьвярджэньні ілжывыя. Дзеяньні ЗША па пераабсталяваньні пускавых установак БРПЛ і цяжкіх бамбавікоў робяць пераабсталяваныя аб’екты няздольнымі прымяняць ядзерную зброю», — падкрэсьліваецца ў заяве.

Усе падрабязнасьці працэсу пераабсталяваньня і яго вынікі былі задакумэнтаваныя і перададзеныя расейскаму боку.

«Абвінавачваньні з боку Расеі ў невыкананьні дамовы Злучанымі Штатамі — беспадстаўныя спробы адцягнуць увагу ад уласных дзеяньняў Расеі і не даюць Расеі важкіх прававых падстаў для прыпыненьня дзеяньня дамовы», — дадалі ў Дзярждэпартамэнце.

У заяве гаворыцца, што ЗША былі гатовыя да канструктыўнай працы на пасяджэньні ДКС, якое павінна было адбыцца ў лістападзе 2022 году, аднак Масква раптоўна адмяніла свой удзел.

Акрамя таго, рэакцыя ЗША на расейскае ўварваньне ва Ўкраіну не вызваляе Маскву ад адказнасьці за выкананьне сваіх юрыдычных абавязаньняў па СНУ-3.

«Невыкананьне Расеяй і меркаванае прыпыненьне дзеяньня СНУ-3 не перашкодзяць Злучаным Штатам працягваць аказваць поўную падтрымку Ўкраіне», — заявілі ў Дзярждэпартамэнце, падкрэсьліўшы, што «ядзерная стабільнасьць асабліва важная падчас крызісаў, і Злучаныя Штаты будуць надалей працаваць над яе падтрыманьнем».