Пра гэта інфармуе «Голас Амэрыкі».
Прэзыдэнт ЗША падкрэсьліў, што хуткія дзеяньні адміністрацыі павінны пераканаць амэрыканцаў у бясьпецы фінансавай сыстэмы краіны.
«Банкаўская сыстэма ЗША надзейная», — сказаў кіраўнік Белага дому.
У заяве, апублікаванай увечары ў нядзелю, прэзыдэнт адзначыў, што «міністар фінансаў і дырэктар Нацыянальнай эканамічнай рады (НЭС) старанна працавалі з банкаўскімі рэгулятарамі над вырашэньнем праблем у Silicon Valley Bank і Signature Bank».
Выступаючы ў панядзелак, Байдэн заявіў, што грошы падаткаплатнікаў ня будуць выкарыстаныя для вырашэньня праблемы.
«Усе грошы (на ўрэгуляваньне крызісу) паступяць са страхавога фонду», — растлумачыў Байдэн.
ГЛЯДЗІЦЕ ТАКСАМА: Крах буйнога банку ў ЗША выклікаў трывогу на Ўол-стрытНовыя меры ўключаюць гарантаваньне ўкладаў у абодвух банках, стварэньне новага мэханізму, каб даваць банкам доступ да надзвычайных фондаў, і спрашчэньне для банкаў магчымасьці браць крэдыты ў Фэдэральнай рэзэрвовай сыстэмы ў надзвычайных сытуацыях.
Байдэн падкрэсьліў, што інвэстараў банкаў прыцягнуць да адказнасьці.
«Ніхто не стаіць вышэй за закон», — канстатаваў прэзыдэнт ЗША.
У нядзельнай заяве Байдэна гаварылася, што «амэрыканскі народ і амэрыканскі бізнэс могуць быць упэўненыя, што іх банкаўскія рахункі будуць цэлыя і захаваныя».
Фэдэральная карпарацыя страхаваньня дэпазытаў у панядзелак заявіла, што перавяла ўсе ўклады Silicon Valley Bank у наваствораны прамежкавы банк і што ўсе фундатары атрымаюць доступ да сваіх грошай з раніцы панядзелка.
«Мы не павінны дапусьціць, каб гэтая сытуацыя паўтарылася», — падкрэсьліў Джо Байдэн.