У суботу і нядзелю на Меншчыне супрацоўнікі КДБ праводзяць аблавы і хапуны праз пашкоджаны самалёта ў Мачулішчах, паведамляе праваабарончы цэнтар «Вясна».
Паводле праваабаронцаў, кэдэбэшнікі хапаюць усіх, каго перасьледвалі па адміністрацыйных палітычных артыкулах з 2020 па 2023 год. Людзей пасьля ператрусаў вязуць у СІЗА КДБ.
Праваабаронцам «Вясны» вядома мінімум аб дзясятку такіх выпадкаў.
ГЛЯДЗІЦЕ ТАКСАМА: «Пры заяўленых 200 грамах тратылу антэну б разьнесла ўшчэнт». Адмысловец, які знаецца на дронах, аналізуе відэа атакі ў Мачулішчах- 26 лютага 2023 году ByPol і лідэры апазыцыі ў выгнаньні паведамілі, што расейскі самалёт далёкага радыёлякацыйнага выяўленьня і кіраваньня А-50У быў пашкоджаны ў выніку атакі бесьпілётнікаў на авіябазу ў Мачулішчах.
- Група ByPol паведаміла пра два выбухі і пашкоджаньне пярэдняй і сярэдняй частак А-50, а таксама антэны радара. Паводле ByPol, удзельнікі пляну «Перамога» скарысталі для гэтага два дроны кампаніі DJI, якія саматужна пераабсталявалі ў дроны-камікадзэ. Кожны дрон нёс выбуховае рэчыва — 200 грамаў у тратылавым эквіваленце. Скарысталі мэталічныя шары, прыблізна 200 штук на кожны.
- Увечары 1 сакавіка дзяржаўныя тэлеканалы паказалі відэа з самалётам А-50, сьцьвярджаючы, што ён не пашкоджаны. На ім самалёт рухаецца ў цемры па засьнежанай бэтоннай паверхі аэрадрому.
- 2 сакавіка праект «Беларускі Гаюн» паведаміў, што расейскі самалёт далёкага радыёлякацыйнага выяўленьня і кіраваньня А-50У з рэгістрацыйным нумарам RF-50608 вылецеў у Расею.
- Роля самалёта А-50 — ствараць пазнавальную карціну паветранай абстаноўкі і забясьпечваць каардынацыю дзеяньняў зьнішчальнікаў.
- Нягледзячы на тое, што пашкоджаньні афіцыйна не пацьверджаныя, брытанская выведка адзначае, што страта А-50 была б значнай для РФ, бо самалёт мае вырашальнае значэньне для расейскіх паветраных апэрацый у стварэньні карціны паветранай прасторы.