Польшча перадасьць Украіне 14 танкаў Leopard 2 цягам «наступных двух-трох тыдняў» пасьля завяршэньня навучаньня ўкраінскіх вайскоўцаў на гэтых машынах, піша CNN.
Прадстаўнік Міністэрства замежных спраў краіны Лукаш Ясіна заявіў, што яго краіна падтрымлівае і адпраўку зьнішчальнікаў ва Ўкраіну, аднак павінен быць дасягнуты кансэнсус паміж краінамі NATO.
«Гэтак жа, як гэта было з танкамі, мы спадзяёмся, што гэтая кааліцыя будзе дастаткова вялікай, каб усё больш падтрымліваць украінцаў. Рэактыўныя самалёты вельмі карысныя ва ўкраінскай вайне. Але мы зьяўляемся сябрам NATO і хочам дасягнуць згоды ва ўсіх такіх пытаньнях, каб удзельнічаць у гэтым разам, таму што альянс мацнейшы, калі мы разам», — сказаў Ясіна.
ГЛЯДЗІЦЕ ТАКСАМА: 8 краін перададуць Украіне танкі Leopard. Агулам вайсковую дапамогу Кіеву даюць 50 дзяржаўУкраінскія афіцыйныя асобы ўзмацнілі жорсткасьць патрабаваньняў да заходніх саюзьнікаў у дачыненьні цяжкога ўзбраеньня. Яно неабходнае, па словах афіцыйнага Кіева, каб адкінуць сілы Расеі. Сярод галоўных патрэбаў Узброеных сіл Украіны называюць вайсковыя самалёты і ракеты большай далёкасьці.
У прыватнасьці, падчас візыту ў Парыж прэзыдэнт Украіны Ўладзімір Зяленскі заклікаў лідэраў Францыі і Нямеччыны «як мага хутчэй» перадаць Кіеву зьнішчальнікі. Аб перадачы баявых самалётаў афіцыйна не заявіла ніводная краіна.
ГЛЯДЗІЦЕ ТАКСАМА: Большасьць амэрыканцаў па-ранейшаму падтрымліваюць дапамогу Ўкраіне ў вайне супраць агрэсіі РасеіДругі дзень візыту Байдэна ў Польшчу
Тым часам прэзыдэнт ЗША Джо Байдэн 22 лютага правядзе ў Варшаве сустрэчу зь лідэрамі «Бухарэсцкай дзявяткі», у якую ўваходзяць 9 краін ўсходняга флянгу NATO. Як піша агенцтва Reuters, Байдэн на сустрэчы запэўніць краіны Ўсходняй Эўропы ў вернасьці ЗША саюзьніцкім абавязаньням і абмяркуе зь імі дапамогу Ўкраіне. Большасьць краін «Бухарэсцкай дзявяткі» выступае за нарошчваньне дапамогі ўкраінскім вайскоўцам.
У «Бухарэсцкую дзявятку» ўваходзяць дзяржавы, якія доўга былі ў складзе ці пад моцным уплывам Савецкага Саюзу, а пасьля яго развалу ўступілі ў NATO. Гэта Баўгарыя, Румынія, Вугоршчына, Славаччына, Чэхія, Польшча, Літва, Латвія і Эстонія.
ГЛЯДЗІЦЕ ТАКСАМА: Інстытут вывучэньня вайны: NATO павінна сплянаваць стратэгію бясьпекі ў рэгіёне ў выпадку паглынаньня Расеяй Беларусі ГЛЯДЗІЦЕ ТАКСАМА: Кангрэсмэн Маккол: ЗША схіляюцца да адпраўкі ва Ўкраіну ракет большай далёкасьці і зьнішчальнікаўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.