«Вясна» зьвярнулася ў ААН у справе парушэньняў правоў і свабодаў сваіх кіраўнікоў падчас суду

Як адзначае юрыст «Вясны» Сьвятлана Галаўнёва, іх утрымліваюць у залі суду ў кайданках і мэталічнай клетцы, што «стварае вобраз небясьпечнага злачынцы і парушае прэзумпцыю невінаватасьці». Паводле яе, выкарыстаньне такіх празьмерных сродкаў перашкаджае праваабаронцам весьці запісы падчас судовага працэсу ці карыстацца дакумэнтамі, прыносіць дыскамфорт і фізычныя пакуты, супярэчыць прынцыпам гуманнасьці, недатыкальнасьці асобы, павагі да яе гонару і годнасьці.

• Парушэньнем правоў падчас суду праваабаронцы таксама лічаць «выкрывальныя» публікацыі пра абвінавачаных у дзяржаўных СМІ, а паказваньне іх за кратамі «ўводзіць у зман аб іх вінаватасьці, хоць прысуду, які набыў сілу, усё яшчэ няма». Гэта таксама парушэньне прэзумпцыі невінаватасьці.
• Яшчэ адно парушэньне, паводле «Вясны», — адмова судзьдзі весьці судовы працэс па-беларуску ці даць абвінавачаным перакладчыка, у той час як у штодзённым жыцьці і ў зносінах зь дзяржаўнымі органамі яны выкарыстоўваюць толькі беларускую мову.

«Крымінальная справа ў дачыненьні да праваабаронцаў палітычна матываваная: фактычна гэта перасьлед за мірную праваабарончую дзейнасьць», — падкрэсьлівае Галаўнёва.

• Паводле яе, улады Беларусі шмат гадоў ігнаравалі рашэньне Камітэту па правах чалавека, які прызнаў пазбаўленьне рэгістрацыі «Вясны» парушэньнем права праваабаронцаў на свабоду асацыяцыі і рэкамэндаваў зноў зарэгістраваць арганізацыю. Невыкананьнем рэкамэндацыі ўлады Беларусі самі зрабілі немагчымым для «Вясны» стаць падаткаплатнікам у краіне і працягваць працу, не парушаючы заканадаўства.

Разгляд крымінальнай справы супраць старшыні «Вясны», Нобэлеўскага ляўрэата Алеся Бяляцкага, яго намесьніка і віцэ-прэзыдэнта FIDH Валянціна Стэфановіча і каардынатара кампаніі «Праваабаронцы за свабодныя выбары» Ўладзіміра Лабковіча і праваабаронцы Дзьмітрыя Салаўёва (у рамках спэцыяльнага вядзеньня яго судзяць завочна) працягваецца ў судзе Ленінскага раёну Менску з 5 студзеня.

Дзяржаўны абвінаваўца Аляксей Кароль на паседжаньні 9 лютага запатрабаваў для іх ад 9 да 12 гадоў пазбаўленьня волі: Алесю Бяляцкаму — 12 гадоў калёніі, Валянціну Стэфановічу — 11, Уладзімеру Лабковічу — 9. Зьмітру Салаўёву, якога судзяць завочна, — 10 гадоў калёніі.

Вядзе працэс судзьдзя Марына Запасьнік. Дзяржаўным абвінаваўцам у справе выступае Аляксандар Кароль. Праваабаронцаў абвінавачваюць у «кантрабандзе арганізаванай групай» (ч. 4 арт. 228 КК) і «фінансаваньні групавых дзеяньняў, якія груба парушаюць грамадзкі парадак» (ч. 2 арт. 342 КК).

Алесь Бяляцкі, Уладзь Лабковіч і Валянцін Стэфановіч знаходзяцца за кратамі з 14 ліпеня 2021 году. Гэта 553 дні.