На борце знаходзіліся 72 чалавекі: 68 пасажыраў і 4 чальцы экіпажу, паведаміў прадстаўнік авіякампаніі.
Як мінімум 67 чалавек загінулі ў выніку крушэньня самалёта, паведаміла паліцыя, піша AFP. Раней выданьне таксама паведаміла са спасылкай на памочніка кіраўніка адміністрацыі акругі Каскі Гурудата Дхакала, што «некаторых выжылых адправілі ў бальніцу для лекаваньня».
Сярод пасажыраў было 15 замежнікаў: 5 індыйцаў, 4 расейцы, 2 карэйцы, па адным — пасажыры з Ірляндыі, Аргентыны, Аўстраліі і Францыі. ТАСС са спасылкай на амбасадара Расеі ў Нэпале Аляксея Новікава паведаміў, што ўсе чацьвёра расейцаў загінулі.
У сеціве зьявілася відэа, на якім бачны самалёт за некалькі хвілінаў да крушэньня.
Самалёт ATR72 павінен быў вылецець з аэрапорта Покхара ў сталіцу Нэпалу Катманду, але загарэўся на ўзьлётнай паласе. Прычыны катастрофы пакуль не вядомыя. Паводле папярэдняй інфармацыі, распаўсюджанай СМІ, у самалёта загарэўся рухавік, пілёт накіраваў яго ў горную цясьніну, каб адвесьці ад населенага пункта.
Гэта найбуйнейшая авіякатастрофа ў Нэпале з 2018 году, калі пры прызямленьні ў аэрапорце Катманду пацярпеў крушэньне самалёт, які ляцеў са сталіцы Бангладэш Дакі. Тады загінуў 51 чалавек з 71, хто знаходзіўся на борце. Нэпал лічыцца краінай, рызыкоўнай для авіяпералётаў, з прычыны свайго высакагорнага рэльефу і зьменлівых ўмоваў надвор'я.
ГЛЯДЗІЦЕ ТАКСАМА: На поўдні Кітаю разьбіўся Boeing авіякампаніі China Eastern