Да канца 2022 году ў сьвеце зьявілася 13 парлямэнцкіх групаў «За дэмакратычную Беларусь». Чым яны займаюцца

Па стане на 27 сьнежня парлямэнцкія групы «За дэмакратычную Беларусь» існуюць у 13 нацыянальных парлямэнтах: у Бэльгіі, Вялікай Брытаніі, Грузіі, Канадзе, Латвіі, Літве, Малдове, Польшчы, ЗША, Украіне, Чэхіі, Швэцыі і Эстоніі, паведамляе прэс-служба Сьвятланы Ціханоўскай.

Акрамя гэтага, працэс стварэньня такіх парлямэнцкіх групаў запушчаны яшчэ ў 6 краінах: у Нямеччыне, Ісьляндыі, Нідэрляндах, Нарвэгіі, Фінляндыі і Францыі.

Як тлумачыць прадстаўнік Сьвятланы Ціханоўскай па парлямэнцкім супрацоўніцтве Анатоль Лябедзька, парлямэнцкія групы — «гэта ня проста фармальная прысутнасьць нашых саюзьнікаў і сяброў дэмакратычнай Беларусі ў парлямэнтах — гэта рэальны рычаг ціску на рэжым і дапамогі свабодным беларусам».

«Такія дэпутацкія групы ўжо аб’ядналі больш за 200 парлямэнтароў, неабыякавых да лёсу беларусаў і гатовых траціць свой час і намаганьні дзеля таго, каб пазытыўныя перамены прыйшлі ў нашу краіну як мага хутчэй», — кажа Анатоль Лябедзька.

Паводле Лябедзькі, парлямэнцкія групы «За дэмакратычную Беларусь» — гэта:

• Магчымасьць трымаць Беларусь у парадку дня ва ўмовах вайны і працягваць дэлегітымізацыю рэжыму.
• Больш за 20 рэзалюцый (толькі за 2022 год) па сытуацыі ў Беларусі з асуджэньнем рэпрэсій і прапановамі па прызнаньні ГУБАЗіКу і КДБ тэрарыстычнымі арганізацыямі, правядзеньні спэцыяльнага трыбуналу ў дачыненьні да рэжыму.
• Гатоўнасьць прымаць беларусаў на стажыроўкі ў нацыянальных парлямэнтах, рыхтаваць кадры для новай Беларусі.
• Прыняцьце законаў, якія дазваляюць падтрымліваць грамадзянскую супольнасьць Беларусі.
• Дзясяткі «хросных», якія ўзялі апякунства над палітычнымі вязьнямі Беларусі. Удзел у акцыях і кампаніях салідарнасьці з ахвярамі палітычных рэпрэсій.
• Афіцыйныя кантакты Сьвятланы Ціханоўскай і падтрымка дэмакратычнай Беларусі ў такіх міжнародных арганізацыях, як ПАРЭ, АБСЭ, Эўрапарлямэнт. Магчымасьць данесьці пункт гледжаньня беларусаў на пленарных паседжаньнях парлямэнтаў Літвы, Латвіі, Эстоніі і іншых краін і абараніць нашыя нацыянальныя інтарэсы.
• Якасная прававая экспэртыза праекту Канстытуцыі новай Беларусі і пакета законаў, які апазыцыя распрацоўвае ў дадатак да будучай Канстытуцыі.