Падчас старшынства ў Эўрапейскім зьвязе (з 1 студзеня да 30 чэрвеня 2023 году) для Швэцыі падтрымка Беларусі будзе прыярытэтам. Такую заяву зрабіў міністар замежных спраў краіны Тобіяс Більстрам на сустрэчы са Сьвятланай Ціханоўскай 5 сьнежня ў Стакгольме.
Пра заяву Тобіяса Більстрама паведаміў BPN старшы дарадца беларускай дэмакратычнай лідэрки Франак Вячорка.
«Ціханоўская заклікала размарозіць швэдзкую дапамогу Беларусі, якая была скарочаная пасьля 2020 году, і накіраваць на падтрымку рэпрэсаваных. Яна падзякавала швэдзкім дыпляматам, якія працуюць у Менску і Вільні, і заклікала ўмацоўваць двухбаковыя дыпляматычныя сувязі з дэмакратычнымі сіламі», — адзначыў Вячорка.
Паводле яго, бакі абмеркавалі таксама, як не дапусьціць уступленьня беларускіх войск у вайну, і магчымасьць прыцягненьня рэжыму да адказнасьці празь міжнародныя інструмэнты.
Тобіяс Більстрам напісаў пасьля сустрэчы, што Швэцыя на баку Ціханоўскай і беларускай апазыцыі. «Вам заўсёды радыя ў Стакгольме для далейшага супрацоўніцтва», — падкрэсьліў кіраўнік швэдзкай дыпляматыі.
ГЛЯДЗІЦЕ ТАКСАМА: «Два тыраны трымаюць маю краіну ў закладніках», — Ціханоўская выступіла на мітынгу салідарнасьці з Украінай у СтакгольмеЦіханоўская ў сваю чаргу адзначыла, што Швэцыя на працягу многіх гадоў падтрымлівае імкненьне беларусаў да свабоды.
«Я радая, што новы швэдзкі ўрад (сфармаваны 18 кастрычніка. — BPN.) працягвае гэтае абавязаньне. Міністар запэўніў мяне, што Швэцыя захавае Беларусь на парадку дня падчас свайго прэзыдэнцтва ў ЭЗ».
Прэм’ер-міністар Швэцыі Ульф Крыстэрсан заявіў Ціханоўскай, што Швэцыя будзе падтрымліваць беларускі дэмакратычны рух, яны абмеркавалі магчымасьць правядзеньня дыскусіі высокага ўзроўню па Беларусі. Ціханоўская расказала пра сытуацыю з Марыяй Калесьнікавай, Алесем Бяляцкім, суд над «чыгуначнымі партызанамі».
Акрамя таго, беларуская палітык патлумачыла, чаму сусьветная супольнасьць мусіць настойваць на вывядзеньні расейскіх войскаў зь Беларусі.
Had a chance to greet @SwedishPM Ulf Kristersson. We discussed the 🇷🇺 de-facto occupation of Belarus. I explained why the world must demand the withdrawal of 🇷🇺 troops from Belarus. I also asked 🇸🇪 to provide assistance to our civil society & punish Lukashenka for his crimes. pic.twitter.com/mI2Qgml0sN
— Sviatlana Tsikhanouskaya (@Tsihanouskaya) December 6, 2022
На перамовах зь міністрам міграцыі Марыяй Стэнэргард Ціханоўская падняла пытаньне міжнароднай абароны беларусаў, якія выехалі ў Швэцыю.
«Згодна з афіцыйнай статыстыкай, толькі 3% запытаў беларусаў аб палітычным прытулку задавальняюцца. Ціханоўская папрасіла знайсьці рашэньне для нашых суайчыньнікаў, якія ўцякаюць ад рэпрэсіяў. Таксама Ціханоўская прапанавала стварыць рабочую групу ў пытаньнях міграцыі з удзелам беларускай дыяспары, папрасіла працягнуць выдачу віз у Менску», — паведаміў Францішак Вячорка.
ГЛЯДЗІЦЕ ТАКСАМА: «Лукашэнка непрымальны, ягоныя словы на Захадзе нічога ня вартыя», — КавалеўскіНа сустрэчы з прэзыдэнтам гарадзкой рады Стакгольма Oле Бурэлем абмеркавалі «пытаньні падтрымкі культурных ініцыятыў і праектаў».
Ціханоўская выступіла перад беларускай дыяспарай, а таксама экспэртнай супольнасьцю на мерапрыемстве аналітычнага цэнтру замежнай палітыкі Stockholm Freeworld Forum. Яна таксама наведала помнік і ўшанавала памяць Рауля Валенбэрга — швэдзкага дыплямата, які ўратаваў жыцьці дзясяткаў тысяч габрэяў падчас Галакосту.
ГЛЯДЗІЦЕ ТАКСАМА: Ціханоўская абмеркавала з генэральным сакратаром АБСЭ сумесныя захады для вызваленьня беларускіх палітвязьняў