15 лістапада ў 15.40 у вёсцы Пшэводаў Грубешаўскага павету Люблінскага ваяводзтва ўпаў снарад расейскай вытворчасьці, у выніку чаго загінулі двое грамадзян Польшчы.
«Учора мы атрымалі пацьвярджэньне, што нашы адмыслоўцы будуць удзельнічаць у расьсьледаваньні. Пакуль яно не завершыцца, мы ня можам сказаць дакладна, якія ракеты ці іхныя часткі ўпалі на тэрыторыі Польшчы. Але мы бачылі карцінкі дыямэтру варонкі. Гэта не маглі быць толькі рэшткі супрацьракетных сыстэм», — сказаў Уладзімір Зяленскі 17 лістапада, выступаючы на канфэрэнцыі Bloomberg New Economy Forum.
«Усе маюць зразумець, што амаль 100 ракет было выпушчана ў той дзень. Я ўдзячны сьвету за падтрымку Ўкраіны сыстэмамі СПА. Гэта ня першы выпадак, калі часткі расейскай ракеты падаюць на тэрыторыю іншай краіны», — цытуе Зяленскага Інтэрфакс-Украіна
«Я ня ведаю дакладна, што адбылося на гэты раз. Сьвет таксама ня ведае на 100%. Я ўпэўнены, што гэта была расейская ракета. Мы ўдзячныя, што нас не абвінавачваюць, таму што мы змагаемся з расейскімі ракетамі на нашай тэрыторыі», — дадаў прэзыдэнт Украіны.
Раней падобны выпадак адбыўся ў Малдове. МУС Малдовы паведаміла, што раніцай 31 кастрычніка на тэрыторыю паселішча Наслаўча Окніцкага раёну на паўночнай мяжы з Украінай упала расейская ракета, зьбітая ўкраінскай сыстэмай СПА. Ахвяраў не было, але ў некалькіх дамах вылецелі шыбы.
Мэрыя Наслаўчы склікала паседжаньне тэрытарыяльнай камісіі па надзвычайных сытуацыях, каб «ацаніць становішча і высьветліць усе акалічнасьці». Сакратар Окніцкай раённай рады Аляксей Галушка пацьвердзіў, што пацярпелі некалькі будынкаў у Наслаўчы.
ГЛЯДЗІЦЕ ТАКСАМА: Прэзыдэнт Дуда пра падзеньне ракеты: «Няма ніякіх прыкметаў таго, што гэта быў наўмысны напад на Польшчу»- 15 лістапада на тэрыторыі Польшчы ў мясцовасьці Пшэводаў, непадалёк ад мяжы з Украінай, адбыўся выбух. Улады пацьвердзілі падзеньне ракеты і паведамілі, што загінулі два чалавекі.
- Польшча выклікала амбасадара Расеі ў Варшаве для тлумачэньняў, пасьля таго як Масква зьняпраўдзіла паведамленьні пра сваю датычнасьць да выбуху ў Пшэводаве.
Прэзыдэнт Польшчы 16 лістапада пракамэнтаваў інцыдэнт з ракетай, якая ўпала каля польска-ўкраінскай мяжы і забіла дваіх чалавек: «Мяркуючы па ўсім, яна была выпушчаная ўкраінскай СПА і, на жаль, няўдала ўпала на нашу тэрыторыю».
«Як нам удалося выявіць на гэты момант, нічога не паказвае на тое, што гэта было наўмыснае дзеяньне, якое можна было кваліфікаваць як атаку на Польшчу. Найбольш верагодна, што гэта быў няшчасны выпадак», — заявіў Анджэй Дуда.
Рэакцыя ў Кіеве
Сакратар Рады нацыянальнай бясьпекі і абароны Ўкраіны Аляксей Данілаў заявіў, што ўкраінскі бок настойвае на супольным вывучэньні інцыдэнту з падзеньнем ракеты ў Польшчы.
«Гатовы перадаць наяўныя ў нас доказы расейскага сьледу. Чакаем ад партнэраў інфармацыі, на падставе якой прыйшлі да высновы, што мова аб ракеце ўкраінскай СПА. Украіна просіць неадкладна даць доступ да месца выбуху прадстаўнікам Міністэрства абароны і Дзяржаўнай памежнай службы Ўкраіны», — паведаміў Аляксей Данілаў на сваёй старонцы ў Twitter.
Рэакцыя NATO і краін Захаду
Генэральны сакратар NATO Енс Столтэнбэрг падчас брыфінгу заявіў, што Ўкраіна не вінаватая ў падзеньні ракеты ў Польшчы. Паводле яго слоў, ракета над Польшчай, верагодна, была выпушчана Ўкраінай выпадкова.
Генэральны сакратар NATO дадаў, што няма ніякіх прыкмет таго, што ракетны ўдар па Польшчы быў наўмысны, і няма прыкмет таго, што РФ плянавала напад на NATO.
Што кажуць у Расеі
У Міністэрстве абароны Расеі таксама пераконваюць, што ракета, якая выбухнула ў Польшчы, «адназначна ідэнтыфікаваная расейскімі спэцыялістамі абаронна-прамысловага комплексу як элемэнты зэнітнай кіраванай ракеты С-300 Паветраных сіл Украіны».
ГЛЯДЗІЦЕ ТАКСАМА: «Ненаўмысны напад на Польшчу». Чорны лебедзь, якога ня хочуць заўважаць ГЛЯДЗІЦЕ ТАКСАМА: Крыніца ў NATO: Байдэн заявіў, што за выбух у Польшчы адказная ракета супрацьпаветранай абароны ЎкраіныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.