Выступаючы перад групай прыхільнікаў у сваёй рэзыдэнцыі ў Флорыдзе, Трамп заявіў, што Злучаныя Штаты знаходзяцца «ў жудасным стане», і ўсклаў віну за гэта на прэзыдэнта ЗША Джо Байдэна і дэмакратаў. Ён падкрэсьліў, што ў гады яго прэзыдэнцтва ў сьвеце было больш стабільнасьці, і калі б ён быў ва ўладзе, то «не было б вайны ва Ўкраіне». «Вяртаньне Амэрыкі пачынаецца цяпер», — заявіў Трамп.
Пасьля чатырохгадовага знаходжаньня ў Белым доме Дональд Трамп прайграў на прэзыдэнцкіх выбарах 2020 году дэмакрату Джо Байдэну, і гэты пройгрыш ён працягвае аспрэчваць у публічных заявах.
JUST IN: Former President Donald Trump announces another run for the White House and enters the 2024 race, aiming to become only the second US president ever elected to two nonconsecutive terms. https://t.co/RTLP0FmAcL pic.twitter.com/2C83Fuhyfh
— CNN (@CNN) November 16, 2022
Вылучэньне Трампам сваёй кандыдатуры празь лічаныя дні пасьля параўнальна няўдалых для Рэспубліканскай партыі прамежкавых выбараў у Кангрэс ня выклікала прыкметнага энтузіязму ў вядомых рэспубліканцаў. Партыі, насуперак прагнозам, удалося дасягнуць толькі мінімальнай большасьці ў Палаце прадстаўнікоў, яна страціла адно месца ў Сэнаце, і Трамп актыўна падтрымліваў многіх з кандыдатаў-рэспубліканцаў, якія прайгралі.
У Трампа ёсьць канкурэнты на намінацыю
Былы віцэ-прэзыдэнт Майк Пэнс заявіў напярэдадні, што ў рэспубліканцаў «ёсьць лепшы выбар, чым Трамп». Некалькі вядомых рэспубліканцаў крытыкуюць Трампа за беспрэцэдэнтна раньні пачатак прэзыдэнцкай гонкі, які адцягне ўвагу партыі ад заканатворчай працы ў Кангрэсе. Аднак падтрымка Трампа сярод рэспубліканцаў застаецца высокай. Да яго станоўча ставяцца 80 працэнтаў зарэгістраваных рэспубліканцаў, што толькі на 11 працэнтаў менш, чым у дзень выбараў у 2020 годзе.
«Ён падвёў Амэрыку», — напісаў на сваёй старонцы ў Твітэры прэзыдэнт Байдэн, зьмясьціўшы відэакліп з крытыкай палітычнай спадчыны Трампа.
Donald Trump failed America. pic.twitter.com/fylyocYcse
— Joe Biden (@JoeBiden) November 16, 2022
У 2024 годзе ў Трампа могуць быць моцныя супернікі на першасных выбарах у барацьбе за намінацыю ад Рэспубліканскай партыі. Яго галоўным канкурэнтам можа стаць губэрнатар Флорыды Рон Дэсантыс, які пасьля пераканаўчай перамогі на губэрнатарскіх выбарах у Флорыдзе, як лічыцца, разглядае вылучэньне сваёй кандыдатуры ў прэзыдэнты. Яшчэ адным канкурэнтам Трампа можа стаць папулярны рэспубліканскі губэрнатар Вірджыніі Глен Янгкін. Трамп ужо выступіў з нэгатыўнымі заявамі пра абодвух губэрнатараў.
Непрадказальным фактарам у гэтых выбарах могуць стаць тры расьсьледаваньні дзеяньняў Трампа, два зь якіх вядзе фэдэральная пракуратура, адно — пракуратура ў Джорджыі. Фэдэральная пракуратура расьсьледуе патэнцыйна незаконнае захоўваньне Трампам прэзыдэнцкіх дакумэнтаў і яго магчымае дачыненьне да дзеяньняў яго прыхільнікаў, якія ўварваліся ў будынак Кангрэсу 6 студзеня 2021 году, каб спыніць сэртыфікацыю вынікаў прэзыдэнцкіх выбараў. У Джорджыі пракуратура расьсьледуе спробы Трампа зьмяніць вынікі прэзыдэнцкіх выбараў 2020 году ў гэтым штаце. Невядома, ці завершацца гэтыя расьсьледаваньні выстаўленьнем абвінавачаньняў.
Толькі адзін прэзыдэнт у гісторыі ЗША, Гровэр Кліўленд, быў абраны на другі прэзыдэнцкі тэрмін пасьля чатырохгадовага перапынку. Гэта адбылося ў 1893 годзе.
ГЛЯДЗІЦЕ ТАКСАМА: Дэмакраты ў ЗША захоўваюць кантроль над Сэнатам ГЛЯДЗІЦЕ ТАКСАМА: Як вынікі выбараў у ЗША паўплываюць на палітыку адносна Беларусі? Тлумачэньне амэрыканскага палітоляга