Хроніка перасьледу 10 лістапада: 2 гады «хатняй хіміі» за ўдзел у пратэсьце ў 2020 годзе

Суд Партызанскага раёну Менску 17 кастрычніка вынес прысуд жыхару Смалявіцкага раёну Максіму Дзіваку. Судзьдзя Міхаіл Макарэвіч абвінаваціў яго ва ўдзеле ў маршы пратэсту ў верасьні 2020 году ў Менску.

У абвінавачаньні сьцьвярджалася, што Дзівак у адзін зь верасьнёўскіх дзён «прыняў актыўны ўдзел у групавых дзеяньнях, якія груба парушаюць грамадзкі парадак», чым, на думку сьледзтва, зьдзейсьніў злачынства, прадугледжанае ч. 1 арт. 342 Крымінальнага кодэксу.

Паводле зьвестак праваабаронцаў, падчас ператрусу дома ў Дзівака сканфіскавалі пратэставыя ўлёткі з выявай бел-чырвона-белага сьцяга, каляндар з надпісам «Пагоня», 2 фрагмэнты палатна бел-чырвона-белага колеру.

Падсудны сваю віну прызнаў цалкам. У выніку яго пакаралі 3 гадамі абмежаваньня волі без накіраваньня ў папраўчую ўстанову адкрытага тыпу («хатняй хіміяй»).

Затрымалі супрацоўніка МТС — нібыта за перадачу зьвестак «Чорнай кнізе Беларусі»

«Пакаяльнае» відэа з затрыманым апублікаваў адзін з праўладных тэлеграм-каналаў, блізкі да сілавікоў. Паводле сілавікоў, мужчына «зьліваў» пэрсанальныя зьвесткі пракурораў і іншых дзяржаўных службоўцаў тэлеграм-каналу «Чорная кніга Беларусі».

Як распавядае сам затрыманы на відэа, ён працаваў у кампаніі МТС у 2020 і 2021 годзе спэцыялістам па працы з кліентамі і меў доступ да зьвестак «рознага канфідэнцыйнага характару».

Як даведалася «Наша Ніва», затрыманы 29-гадовы Андрэй Цыпак — зь Берасьця, у маладосьці гуляў у гандбол у гандбольным клюбе імя Мяшкова, дзе быў дэбютантам сэзону 2012-2013 і быў у складзе клюба, калі ён два сэзоны запар выйграваў чэмпіянат Беларусі — у 2014 і 2015 гадах.

62-гадовай жанчыне прысудзілі год калёніі за рэпост з асабістымі зьвесткамі сілавіка

У судзе Жабінкаўскага раёну асудзілі Натальлю Лецку за рэпост допісу з асабістымі зьвесткамі сілавіка паводле арт. 188 («Паклёп») і ч. 3 арт. 203-1 («Незаконныя дзеяньні ў дачыненьні да інфармацыі аб прыватным жыцьці і пэрсанальных зьвестках») КК.

Натальлю абвінавацілі ў тым, што яна на сваёй старонцы зрабіла рэпост публікацыі з асабістымі зьвесткамі супрацоўніка органаў унутраных спраў. Таксама жанчына апублікавала фатаздымак сілавіка з уласным камэнтаром пра зьдзейсьненыя ім злачынствы. Суд вырашыў, што інфармацыя ў камэнтары «сьвядома ілжывая» і дыскрэдытуе супрацоўніка ў вачах грамадзтва.

Судзьдзя Віктар Новік прысудзіў жанчыне 1 год калёніі агульнага рэжыму і штраф 50 базавых велічыняў (1600 рублёў). Таксама ў межах грамадзянскага пазову з Натальлі спагналі 1000 рублёў «кампэнсацыі маральнай шкоды» на карысьць сілавіка.

Менчуку прысудзілі 1,5 года калёніі за абразу Лукашэнкі

У судзе Слонімскага раёну 10 лістапада Дзяніса Воўчака абвінавацілі паводле ч. 1 арт. 368 КК (абраза Лукашэнкі) і ч. 3 арт. 203-1 КК («Незаконныя дзеяньні ў дачыненьні да інфармацыі аб прыватным жыцьці і пэрсанальных зьвестках»). Справу разглядаў судзьдзя Аляксандар Ярмолік.

2 жніўня ў праўладных тэлеграм-каналах зьявілася «пакаяннае» відэа, у якім Дзянісу ставілі ў віну ўдзел у пратэстах у Менску, а таксама распаўсюд экстрэмісцкіх матэрыялаў і абразу Лукашэнкі.

У Полацку затрымалі беларуса, які вярнуўся з Польшчы

Затрыманы — Генадзь Бярдзенеў, ён нядаўна прыехаў з Польшчы, дзе працаваў апошнія тры месяцы і зьбіраўся ў бліжэйшыя дні зноў вярнуцца назад. Суд пройдзе заўтра, мужчыну будуць судзіць паводле адміністрацыйнага артыкулу, якога — пакуль не вядома, паведамляе «Вясна».

Каля пяці гадоў таму Генадзь быў адным з ініцыятараў стварэньня пярвічнай арганізацыі «Свабодны прафсаюз» сярод ІП на Полацкім рынку.

У Горадні судзяць прафсаюзнага лідэра Андрэя Ханевіча. Яму запрасілі 5 гадоў турмы

У Горадзенскім абласным судзе працягнулі разгляд крымінальнай справы супраць старшыні першаснай арганізацыі Беларускага Незалежнага прафсаюзу працаўнікоў ААТ «Гродна Азот» Андрэя Ханевіча. Гэта ўжо трэцяе пасяджэньне. Пракурор запрасіў для яго 5 гадоў калёніі.

Ханевіча абвінавачваюць паводле арт. 369-1 (Дыскрэдытацыя Рэспублікі Беларусь) і арт. 361-4 (Садзейнічаньне экстрэмісцкай дзейнасьці) Крымінальнага кодэксу. Паведамляецца, што мужчыну ставяць у віну размову з журналістам «Белсат», падчас якой Андрэй «перадаў нейкія зьвесткі». Тэлефон Андрэя праслухоўвалі, размовы запісвалі супрацоўнікі спэцслужбаў, паведамляюць праваабаронцы.

Прысуд Ханевічу вынесуць 16 лістапада.

Сілавікі затрымалі пару інстаблогераў — Кацярыну і Сяргея Чарэшку

Калі верыць праўладнаму тэлеграм-каналу, іх прызналі падазраванымі па крымінальнай справе — але па якой, не ўдакладняецца. Мяркуючы па «пакаяльным відэа», да блогераў прыйшлі з прычыны ўдзелу ў пратэстах, піша @the_village_me.

У Полацку затрымалі сына зьняволенай старшыні незалежнага прафсаюзу «Нафтан» Вольгі Брыцікавай

Сына Вольгі Брыцікавай Ягора затрымалі 10 лістапада, паведамляе прэс-служба СПБ.

Самой Вользе нядаўна далі 15 дзён арышту за «распаўсюд экстрэмісцкіх матэрыялаў».

Адзначаецца, што Ягор прыйшоў з войска за дзень да суду над маці і на судзе прадстаўляў яе інтарэсы. Пасьля яе арышту ён штодня наведваў ІЧУ, дзе знаходзілася Вольга.

Прычына затрыманьня Ягора невядомая. Пазьней стала вядома, што Ягора выпусьцілі.