Па дадзеных дэпутатаў сэнату, на сёньняшні дзень па студзеньскіх падзеях асуджаныя 1112 чалавек, зь іх у дачыненьні да 128 вынесены прысуды, зьвязаныя з пазбаўленьнем волі. Пасьля прыняцьця закону з турмаў плянуюць вызваліць каля ста чалавек, заявіў сэнатар Уладзімір Волкаў.
Праваабаронцы неаднаразова выказвалі апасеньні, што ўлады могуць выкарыстоўваць амністыю, каб адвесьці ад адказнасьці супрацоўнікаў сілавых структур, якія стралялі ў мірных грамадзян і катавалі затрыманых.
У студзені ў шэрагу гарадоў Казахстану прайшла сэрыя палітычных пратэстаў, якая перарасла ў сутыкненьні ўдзельнікаў з прадстаўнікамі ўлад. Улады на некалькі дзён страцілі кантроль над некалькімі гарадамі, у тым ліку над найбуйнейшым горадам краіны Алматы.
Па афіцыйных дадзеных, падчас студзеньскіх падзей у Казахстане загінулі 238 чалавек, большасьць якіх — цывільныя асобы. Шэсьць чалавек з гэтага ліку памерлі пад вартай — ад катаваньняў.
ГЛЯДЗІЦЕ ТАКСАМА: Журналіста Алеся Любенчука асудзілі на 3 гады пазбаўленьня волі ГЛЯДЗІЦЕ ТАКСАМА: Чэскі драматург ініцыяваў кампанію за вызваленьне беларускай палітзьняволенай