Калінінградзкіх дальнабойнікаў не выпускаюць зь Беларусі за мяжу з прычыны мабілізацыі

Зь Беларусі перасталі выпускаць калінінградзкіх кіроўцаў фур, якія вярталіся ў свой рэгіён. Яны стаяць там па некалькі дзён, некаторым даводзіцца кідаць машыны і дабірацца дадому самалётам праз Маскву і Піцер.

Калінінградзкае выданьне «Клопс» паразмаўляла са сваімі дальнабойнікамі і высьветліла, як ідуць справы на мяжы.

Максім праходзіў пункт пропуску «Катлоўка» ў нядзелю, 23 кастрычніка. Калінінградзец вёз у родны рэгіён тавар з Расеі — фура запоўненая пельменямі, чабурэкамі, маслам. Максім і грузавік з паўфабрыкатамі да гэтага часу так і знаходзяцца на беларускім баку — яго і іншых кіроўцаў не выпускаюць з краіны.

«У мытні, атрымліваецца, аформіўся. Усё без праблем. На пашпартны кантроль пайшоў, а там пачалі тэлефанаваць старшаму зьмены. У выніку стаіць забарона на выезд з Рэспублікі Беларусь. Даведка з камісарыяту ёсьць, позвы не атрымліваў, у сьпісах мяне таксама быццам няма», — кажа дальнабойнік.

Тым, хто не служылі раней, пашанцавала больш — іх прапускаюць, не патрабуючы дадаткова ніякіх дакумэнтаў. Максім упэўнены, што ўся справа ў мабілізацыі. Як ён расказаў, з 20 кастрычніка каля мяжы затрымалася шмат такіх жа пацярпелых. Усім да 35 гадоў, служылі, амаль усе прыпісаныя да камісарыяту гораду Савецку.

ГЛЯДЗІЦЕ ТАКСАМА: Украінская выведка заявіла, што Расея перакінула на тэрыторыю Беларусі 3200 сваіх салдатаў. Гэта значана меней, чым казалі ў Менску

Да Максіма ўжо выехаў кіроўца. Ён забярэ фуру і адвязе яе ў рэгіён. Сам калінінградзец паедзе да Масквы, там сядзе на самалёт — і дадому. Фірма, на якую працуе мужчына, аплачвае дні прастою і гатовая кампэнсаваць авіябілеты.

«Клопс» удалося зьвязацца і зь іншым калінінградцам, якога разгарнулі. Сяргей таксама заехаў у нядзелю на той жа пункт пропуску, але да гэтага часу ня змог пакінуць Беларусь. Як расказвае мужчына, на пашпартным кантролі яму паведамілі, што выезд зь Беларусі забаронены. Дальнабойнік налічыў ужо 25 кіроўцаў, якім сказалі тое ж самае. У іх фурах розныя тавары: ад будматэрыялаў да малочных прадуктаў.

Перавозчык Яўген, працадаўца Сяргея, пакуль ня ведае, што рабіць далей. У рэдакцыю «Клопс» зьвярнулася жонка аднаго з мужчын, якога не выпусьцілі. Паводле яе, «неўзабаве скончацца грошы і ежа».

ГЛЯДЗІЦЕ ТАКСАМА: Грамадзян Расеі здымаюць з рэйсаў у менскім аэрапорце. Нават тых, каму не прыходзіла позва аб мабілізацыі

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.