La Repubblica публікуе інфармацыю пра выхад у мора з аднаго з паўночных партоў Расеі найноўшай субмарыны «Белгород», якая была ўведзеная ў эксплюатацыю ў ліпені 2022 году.
Паводле La Repubblica, гэтая тарпэда была прадстаўленая Крамлём у 2018 годзе як адна з сыстэм, якая верне Расеі стратэгічную перавагу. Тарпэда з магутнай ядзернай боегалоўкай можа непрыкметна прайсьці пад вадой дзесяць тысяч кілямэтраў, а пасьля выбухнуць ля ўзьбярэжжа, выклікаўшы радыяактыўнае цунамі. Заражаная радыяцыяй хваля можа сьцерці з твару зямлі такія мэгаполісы, як Нью-Ёрк ці Лос-Анджэлес.
Зрэшты, экспэрты кажуць, што такога ж эфэкту можна дабіцца і зь міжкантынэнтальнымі балістычнымі ракетамі, якія існуюць з 1960-х гадоў.
Італьянскія журналісты спасылаюцца на справаздачу выведкі NATO, якая была адпраўленая у апошнія дні найбольш важным саюзным камандаваньням, і ў якой паведамлялася аб перамяшчэньні атамнай падводнай лодкі «Белгород».
Лодка знаходзіцца ў паўночных шыротах і, як мяркуюць у NATO, яе місія можа заключацца ў тым, каб упершыню выпрабаваць супэртарпэду «Посейдон», якую часта называюць «зброяй Апакаліпсісу».
ГЛЯДЗІЦЕ ТАКСАМА: «Велізарная колькасьць людзей проста загіне». Прафэсар Бандажэўскі пра тое, што можна, а чаго нельга зрабіць у выпадку ядзернага ўдаруГэтую тарпэду цяжка перахапіць з дапамогай радараў, бо яна рухаецца амаль бяз гуку. Злучаныя Штаты маюць сетку спадарожнікаў з інфрачырвонымі датчыкамі для таго, каб адсочваць вылет расейскіх ракет, бо пры іх адбываецца моцны выкід цяпла з рухавікоў. Але спадарожнікі ня бачаць таго, што адбываецца ў марскіх глыбінях. Супэртарпэда «Посейдон» была спраектаваная так, каб выпраменьваць вельмі мала цяпла і бясшумна рухацца пад вадой з хуткасьцю больш за сто кілямэтраў на гадзіну.
Падводная лодка К-329 «Белгород», піша газэта, лічыцца прататыпам новай канцэпцыі вайны, задуманай пуцінскімі адміраламі ў апошнія гады, пасьля вяртаньня напружанасьці ў адносінах з ЗША.
Ня маючы буйных авіяносцаў і крэйсэраў, каб скласьці канкурэнцыю ВМС ЗША, расейцы, паводле La Repubblica, засяродзіліся на падводных апаратах. «Белгород» мае 184 мэтры ў даўжыню і 15 мэтраў у шырыню, ён можа перамяшчацца пад вадой з хуткасьцю каля шасьцідзесяці кілямэтраў за гадзіну. Лодка мае вялікую аўтаномію, яна можа знаходзіцца пад вадой прыкладна 120 дзён без неабходнасьці ўсплываньня на паверхню.
Прапэлеры К-329 «Белгород» таксама лічацца інавацыйнымі, таму што яны прызначаныя для абароны ад санараў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.