Міжнароднае агенцтва атамнай энэргіі (МАГАТЭ) выказала заклапочанасьць выкраданьнем расейскімі войскамі гендырэктара акупаванай Запароскай АЭС Ігара Мурашова. Пра гэта заявіў генэральны дырэктар агенцтва Рафаэль Гросі, паведамляе прэс-служба МАГАТЭ.
Як заявіў Гросі, МАГАТЭ дамагаецца тлумачэньняў дзеяньняў расейскіх вайскоўцаў і спадзяецца на найхутчэйшае вызваленьне Мурашова.
«Затрыманьне любога чальца пэрсаналу станцыі само па сабе стала б крыніцай сурʼёзнай заклапочанасьці, асабліва з-за псыхалягічнага ўздзеяньня і ціску на астатні пэрсанал, што наносіць урон ядзернай бясьпецы. Генэральны дырэктар АЭС нясе адказнасьць за захаванасьць станцыі. Акрамя таго, ён кіруе рэагаваньнем на любую аварыйную сытуацыю на месцы. Такім чынам, яго адсутнасьць на рабоце таксама аказвае непасрэдны і сурʼёзны ўплыў на прыняцьце рашэньняў па забесьпячэньню бясьпекі і аховы станцыі», — заявіў між іншага кіраўнік МАГАТЭ.
Кіраўнікі МАГАТЭ спадзяецца, што Ігар Мурашоў найбліжэйшым часам вернецца да сваёй сямʼі і зможа аднавіць працу на АЭС.
Чакаецца, што сам Рафаэль Гросі наведае Кіеў і Маскву на наступным тыдні.
ГЛЯДЗІЦЕ ТАКСАМА: ISW: Пуцін засяродзіўся на ўтрыманьні захопленых тэрыторый поўдня Ўкраіны і ўзяцьці пад кантроль Запароскай АЭСВыкраданьне Мурашова
Расейскія вайскоўцы выкралі генэральнага дырэктара Запароскай АЭС Ігара Мурашова. Пра гэта заявіў дырэктар украінскай кампаніі «Енергоатом» Пятро Коцін.
Запароская АЭС у горадзе Энэргадар з сакавіка знаходзіцца пад кантролем расейскіх вайскоўцаў. На станцыі працягвае працаваць украінскі пэрсанал.
Як гаворыцца ў заяве кіраўніка «Енергоатома», 30 верасьня каля 16 гадзінаў Мурашова затрымаў патруль, калі той ехаў у аўтамабілі ад чыгуначнай станцыі ў Энэргадар. Яму завязалі вочы і павезьлі ў невядомым напрамку. Інфармацыі аб ягоным месцазнаходжаньні няма.
Расейскае войска захапіла ЗАЭС у пачатку сакавіка, эксплюатаваць станцыю працягвае ўкраінскі пэрсанал.
Тэрыторыю Запароскай АЭС пэрыядычна абстрэльваюць. Бакі абвінавачваюць у іх адно аднаго. Украіна і краіны Захаду заклікаюць да дэмілітарызацыі станцыі, гэта значыць вываду зь яе тэрыторыі расейскіх вайскоўцаў. Рэзалюцыю з такім заклікам прыняла і МАГАТЭ. Расея адказвае адмовай.
Каля месяца таму станцыю наведала камісія МАГАТЭ на чале з Гросі, два спэцыялісты міжнароднага агенцтва засталіся там на працяглы тэрмін для маніторынгу сытуацыі.
ГЛЯДЗІЦЕ ТАКСАМА: «Завязалі вочы і павезьлі». Украіна заявіла, што вайскоўцы РФ выкралі гендырэктара Запароскай АЭС ГЛЯДЗІЦЕ ТАКСАМА: «Енергоатам»: Войскі Расеі абстралялі Запароскую АЭСВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.