За мінулую ноч у Расіі падпалілі яшчэ чатыры ваенкаматы і будынкі адміністрацыі.
З пачатку расейскага ўварваньня ва Ўкраіну па ўсёй Расеі падпальваюць ваенкаматы. Усяго вядома ўжо пра 23 такія выпадкі. Таксама гараць аддзелы паліцыі і будынкі гарадзкіх адміністрацый.
Да раніцы 23 верасьня стала вядома яшчэ пра некалькі новых падпалаў ваенкаматаў і будынкаў адміністрацый у рэгіёнах Расеі. Выпадкі сабрала выданьне Sota.
- У горадзе Свабодным Амурскай вобласці невядомы кінуў бутэльку з запальнай сумесьсю ў будынак ваенкамату.
- Раніцай у Хабараўску невядомы заклаў два «кактэйлі Молатава» паміж аконных кратаў ваенкамата і падпаліў іх. У выніку лопнулі шыбы, пажар патушылі супрацоўнікі ваенкамату.
- У пасёлку Цалінным Алтайскага краю загарэўся Дом культуры, дзе знаходзіцца ў тым ліку адміністрацыя сельсавету і аддзяленьне «Пошты Расеі». Паштовы офіс выгараў цалкам, у памяшканьні адміністрацыі агнём пашкодзіла столь.
- Таксама ноччу ў горадзе Камышыне Валгаградзкай вобласьці невядомыя кінулі «запальны прадмет» у раённую адміністрацыю. У Кастраме ваенкамат расьпісалі антываеннымі заклікамі.
- Раніцай 22 верасьня ў Тальяці Самарскай вобласьці загарэліся дзьверы будынку гарадзкой адміністрацыі. Супрацоўнікі Цэнтру «Э», якія прыбылі на месца, знайшлі выкарыстаныя бутэлькі з запальнай сумесьсю.
- Учора невядомыя падпалілі будынак гарадзкой адміністрацыі ў Тальяці і ваенкаматы ў Санкт-Пецярбургу, Ніжагародскай і Арэнбургскай абласьцях, а таксама ў Забайкальскім краі.
Што вядома пра папярэднія выпадкі падпалаў ваенкаматаў
- Уначы 28 лютага ў Лухавіцах Маскоўскай вобласьці ў будынку ваенкамату разьбілі шыбы і кінулі ўсярэдзіну «кактэйлі Молатава». СМІ паведамлялі, што на варотах пакінулі малюнкі ў колерах украінскага сьцяга і антываенны надпіс. У падпале падазравалі 21-гадовага мясцовага жыхара, яго затрымалі, празь некалькі дзён ён уцёк з паліцыі, але потым, хутчэй за ўсё, быў затрыманы зноў.
- У ноч на 11 сакавіка ў горадзе Беразоўскі Сьвярдлоўскай вобласьці мужчына падпаліў уваход у будынак ваенкамату, агонь хутка знайшлі і патушылі, падазраванага затрымалі. Па дадзеных СМІ, гэта 24-гадовы кансультант крамы электронікі, які нібыта «хацеў сарваць прызыўную кампанію». Яго адправілі ў СІЗА праз абвінавачаньне ў замаху на забойства.
- У ноч на 19 сакавіка ў горадзе Шуя Іванаўскай вобласьці ў акно ваенкамату кінулі запальную сумесь. Пацярпела толькі само акно. Празь некалькі гадзін падазраванага затрымалі. Перад гэтым ён нібыта, нягледзячы на тое, што быў моцна п’яны, стараўся ўцячы ад паліцыі. Мужчыну адправілі ў СІЗА.
- Уначы 18 красавіка ў пасёлку Зубава Паляна ў Мардовіі ваенкамат закідалі «кактэйлямі Молатава», згарэлі некалькі кабінэтаў, дзе былі дадзеныя прызыўнікоў, кампутары. Была заведзена крымінальная справа, аднак пра затрыманьні падазраваных не паведамлялася.
- Уначы 4 траўня ў Ніжневартаўску (Ханты-Мансійская аўтаномная акруга) двое невядомых закінулі восем «кактэйляў Молатава» ў будынак ваенкамату праз вокны, загарэўся яго тамбур, аднак агонь хутка патушылі. Былі заведзеныя крымінальныя справы аб хуліганстве і пашкоджаньні маёмасьці, але пра затрыманьне падазраваных зноў жа не паведамлялася.
21 верасьня прэзыдэнт Расеі Ўладзімір Пуцін абвясьціў правядзеньне ў краіне «частковай мабілізацыі» і падпісаў адпаведны ўказ.
Міністар абароны Сяргей Шайгу заяўляў, што ў рамках «частковай мабілізацыі» плянуецца прызваць 300 тысяч чалавек.
ГЛЯДЗІЦЕ ТАКСАМА: Інстытут вывучэньня вайны: Крэмль адкрыта не выконвае абяцаных умоў «частковай мабілізацыі»Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.